Teletini al ataque

La Televisión del Principáu d'Asturies (TPA), más conocía nel país col llamatu de Teletini, va estrenar güei, miércoles, "Un día con...", programa nel que la periodista Nieves Herrero dialoga y interactúa con 14 personalidaes de diferentes ámbitos de la sociedá española. La primer protagonista va ser Concha Velasco. Depués llegarán episodios colos actores Soledad Mallol y Arturo Fernández; los cantantes Manolo Escobar, Lolita Soraya y Falete; el peluqueru Lluis Llongueras; la modelu Laura Ponte, el ex deportista Fernando Romay y el ex toreru Ortega Cano, ente otros.

Como bien se ve, ye un programa pernecesariu p'Asturies, qu'aportará muncho al país y que afondará na cultura llariega. Yera un clamor popular que Nieves Herrero desembarcare en Teletini, pa ensiñanos a facer periodismu d'altura. Y too ello dende esa perspectiva asturiana que siempre-y da la Herrero. Tamién s'echaba en falta na TPA a personaxes tan fondamente asturianos y que tanto pueden aportar a esta nación pequeñina como Manolo Escobar, Falete, Lluis Llongueras o Ortega Cano. Podemos los asturianos tar contentos colos responsables de la programación de Teletini, que nos ufiertan programes d'un valor inestimable. Esti ye'l camín. Asína se fai país, asína se fomenta la cultura. Gracies, gracies.

Xusticia

Nun sé lo que dirá'l Códigu Penal austriacu, pero si'l monstruu que mantuvo enterrada en vida a la so fía demientres 24 años, la violó dende que tenía 11 años y fizo-y siete fíos, si esi ser inhumanu fora español posiblemente nun entraría na cárcel. Porque n'España la edá penal másima tá establecía en 70 años. Pedro Pacheco, andalucista ex alcalde de Xerez, tevo percerca de dir a la cárcel por dicir que la xusticia n'España yera "un cachondeo". La xusticia, nun sé, pero'l Códigu Penal, paezlo.

Infiernu

L'infiernu afayábase nun suétanu d'Austria. Delles vegaes l'horror escuéndese baxo xardines floríos.

L'Estatutu y los calcetos

El PSOE –del PP val más nun falar– criticó güei a IU porque la coalición quier un nuevu Estatutu, a caballu ente los de Castiella-La Mancha, Andalucía y Cataluña. L'agrín y repunantucu diputáu socialista Fernando Lastra, inquisidor mayor del reinu, cargó escontra IU por querer "camudalo too, mirando al modelu catalán, col argumentu de que representa la másima autonomía". Unes preguntines perfáciles: ¿Ye malo mirar al modelu catalán, que tanto defendiera'l PSOE, o ye que tenía razón el PP al criticalu? ¿Lo que ye bono pa Cataluña ye malo p'Asturies? ¿La másima autonomía ye bona pa Cataluña y mala p'Asturies? ¿Sedrá qu'hay que falar catalán na intimidá pa merecer unos calcetos nuevos envede conformase col remiendu de los que ya tan trildos?

Lastra, más alantre, sorrayó que la reforma que PSOE y PP defenden pal Estatutu d'Asturies, al contrariu que lo que propón IU, "s'enmarca nun proyeutu común, que ye España, y trata de modernizar y de impulsar l'Estáu de les autonomíes". Entos, ¿ye que l'Estatutu catalán nun s'enmarca nesi proyeutu común que llamen España? ¿Ye que nun busca modernizar y impulsar l'Estáu de les autonomíes l'Estatutu catalán? Taría bien qu'estos socialistes esplicaran por qué defendieron tanto l'Estatutu de Cataluña si agora ye tan malu. ¿O sedrá qu'Asturies ye menos país que Cataluña? ¿O sedrá qu'Asturies nun ye nacionalidá histórica? ¿O sedrá qu'Asturies nun ye nacionalidá? ¿O sedrá qu'Asturies nun ye?

Infiernu

Esti día entamé a ver na televisión un reportax de les barbaridaes nazis. Dexóme mui mal. Dalgunes vegaes paez que la crueldá humana nun tien llendes. Aguanté lo que pudi. Hasta que vi como nun campu concentración, un nazi separtaba unos metros a un críu d'unos tres o cuatro años de la so madre. La voz en off dixo qu'entonces "pegó-y un tiru"... Nun sé si l'asesín rabiosu mato al neñu o a la ma, porque nun fui quien a siguir mirando. Apagué la tele y zarré los güeyos.

Tovía teo na cabeza los muertos, les tortures y a esi chiquitín inocente y a esa madre, desesperaos, impotentes y vencíos, atrapaos nel infiernu.

El pastel eleutoral

Nada nuevu. PSOE y PP repartiéronse tóu'l pastel, como siempre. Conocíemos el nome de los ocho diputaos asturianos anantes de les votaciones, lo que demuestra qu'esta ye una democracia dirixía, una democracia pa menores d'edá, una partitocracia na que son los aparatos de los partíos los que ponen, quiten y deciden. D'ehí que los diputaos y demás cargos públicos rindan cuentes ante l'aparatu del partíu, y non ante los ciudadanos. Queda tamién demostrao lo que ye güei'l movimientu asturianista: 2.102 votos. Los que sumaron Andecha Astur y Unidá. Nada. Cero. Deprimente.

El bipartidismu impúsose n'Asturies, como en cuasi toos los requexos del Estáu. Eso significa, por dolorosu que seya, que la cabera esperanza p'algamar la oficialidá del asturianu pasa o pol PSOE o pol PP. Y nesti momentu vese munchu más cerca de la oficialidá al PP. El PSOE nunca enxamás apoyará la oficialidá con Vicente Álvarez Areces na presidencia. Los socialistes, estos socialistes tan a otres coses, pa ellos más importantes, mientres que'l PP anda dando palos de ciegu, a la gueta de so. Ye lo qu'hai. Esti país ye lo que ye. Y polo que se ve nun quier ser otra cosa. Asumilo ye'l primer pasu p'alcontrar el camín que conduza a la oficialidá; o lo que ye lo mesmo, a la dignidá.

Resultaos de les eleiciones xenerales n'Asturies equí.

Voté

A la final voté, anque sin muncho aquello.

Inhumano

Matar ye inhumano.

Falta de chapeta

Esti día la Xeneralidá de Cataluña editó un cartel del Día de la Muyer en 25 idiomes, ente los que tan el catalán, el serbucroata, l'urdú, el bengalí, el rusu, l'esperantu, el vascu, el xaponés... Pero nun apaez el castellanu. Al marxe d'ideoloxíes, esto ye una fatada xigantesca. El catalán nun gana un res con esta falta de chapeta. Sobren faltosaes.

La cuestión

Votar o nun votar, esa ye la cuestión.

Papelón vergoñosu

Esti día peme vergoñosu'l papelón de la mayoría de los periodistes nos debates televisivos tres el debate Zapatero-Rajoy. Ye triste ver como llamben ca ún al so amu. Ye indecente ver como faen el trabayu suciu, utilizando la demagoxa, col únicu oxetivu de convencer al pueblu llano de que gano'l so patrón. Saben que los analfabetos políticos, que son lexón, déxense llevar poles sensaciones, polo que piensa la mayoría. Y les sensaciones, güei, xenérenles les encuestes y los titulares de prensa.

Nun hai más que ver los titulares pa entender que los principales periódicos españoles nun faen periodismu, sinón política.

El País:

Zapatero tumba a Rajoy

El Mundo:

Rajoy reta en vano a Zapatero a que defienda el español en Cataluña

La Vanguardia:

Zapatero se impone

ABC:

Rajoy resiste un debate que Zapatero intentó convertir en una bronca

El Periódico de Catalunya:

Zapatero se impone con claridad a Rajoy

La Razón:

Rajoy mantiene su ventaja aportando soluciones

Público:

Rajoy no pasa el examen

Crítiques

Esti día un llector, conocedor del mio pensamientu políticu, estrañábase de que llanzara nesti blog más crítiques a la izquierda que a la derecha. La esplicación ye cenciella: yo nunca creyí na derecha.

Faltón González

Esti día un tal Felipe González, que según cuenten foi presidente del Gobiernu d'España, pronunció una fras de les que califiquen al que les pronuncia y que queden pa la historia: "Decir que Rajoy es más moderado y razonable que Zapatero sólo se le ocurre a un imbécil". Sobra dicir que nun me doi por aludíu, y non porque piense que Zp ye más moderáu y razonable que Rj, que tampocu. Pero peme xustu dexar claro que'l tal González falto-yos al respetu a más de la metá de los españoles. Porque acaba de llama-yos imbéciles a tolos votantes del PP (buenu, a toos menos a Gallardón, que va por llibre) y a muchos otros que, anque voten a otros partíos, pueden pensar que Rj ye más moderáu y razonable que ZP. Total, que too esto vien a demostrar que los demás nun sé, pero el que paez imbécil ye'l tal González. Imbécil y faltón.

Mentira

Esti día viose a Javier Bardem recoyer l'Óscar a la meyor interpretación masculina protagonista de 2007. Sedrá merecíu el premiu, eso nun voy discutilo, porque'l rapaz dicen que ye bon actor. Pero si m'estraña permuncho ver como estos Bardem y otros como ellos, antiamericanos declaraos y supermegaprogres, pierden el culu pa que-yos den premios, precisamente, los conservadorones americanos a los que tanto critiquen. Ye asina que cuando veo a esos presuntos izquierdistes neses folixes, entregaos al lluxu y a l escesu na vexiga mesma del Imperiu, envueltos en traxes desaxeraos, que cuesten el dineru que nun ganaríen munches families en venti años, dexo d'entender. O, meyor tovía, entiéndolo too: ye mentira; ye too mentira. Estos nun creyen en nada de lo que dicen. Ye namái otru papelón, col que pretenden combayar colos probes, asegurándo-yos que tan con ellos, que son como ellos, que piensen como ellos, que viven como ellos. Pero ye mentira: estos nun son socialistes, nun pueden selo. Son solo unos espabilaos que, col so cuentu al costín, viven como cures. Hai una colección d'ellos nesta península de pandereta y tarrañuela.

"La yenka"

Esti día Zapatero y Rajoy baillaron "La yenka". Tola nueche anduvieron colo de "izquierda, izquierda; derecha, derecha; delante, detrás; un, dos, tres". Esto ye, munchu movimientu aparente, pero, a la fin, too quedaba en mesmu sitiu. Nuna braera burlla a los ciudadanos, ensiñaron dambos milenta gráficos, surdíos de torpes manipulaciones matemátiques que nun engañaben nin a un neñu teta. Ye lo qu'hai. Y, polo que se ve, ye lo que gusta. Porque l'ochenta por cientu de los votantes, o más, darán-yos respaldu a estos dos individuos nes elecciones del prósimu 9 de marzu. Hai que da-yos tamién lo suyu a los medios de comunicación, que, casi sin escepción, proclamaron ganador al so candidatu, por puru interés políticu, sin dengún tipu d'analisis periodísticu imparcial y responsable. Lo que demuestra que les encuestes d'encargu son, polo xeneral, mentires mercenaries, y que la mayoría de los medios de comunicación nun pretenden informar, formar y entretener, sinón manipular, adoctrinar y distrayer.

Queda un segundu debate, el prósimu llunes. Depués de que Zapatero y Rajoy charraran ayeri ca ún de lo que-y petó, sin casi escuchar al otru; depués de que nun ficieran más qu'insultase y mirar p'atrás, sedría conveniente que'l llunes punxeran la vista al frente y se dedicaran a dar soluciones y propuestes de futuru pa resolver los problemes de los alministraos. Que son los que-yos paguen los sos sueldos (non chicos, por ciertu). Taría bien (sedría normal) que los dos únicos candidatos con posibilidaes reales d'algamar la presidencia del Gobiernu d'España ficieran daqué más que baillar otra vez "La yenka", una canción que tuvo bien va 42 años, pero que yá fiede.

Fidel Castro

Esti día talamente paez que l'universu enteru xira alredor de Fidel Castro.

El so manifiestu:

• Dominiu d'hades 2.0
  

Enllaces interesantes (de tolos senes):

• Voltairenet
  
• Rebelión
  
• Patria Grande
  
• Fidel-Castro
  
• CubaEncuentro
• Asturies Lliberal
  
• Wikipedia
  
• Enciclopedia
  
• El Mundo
  
• El País
  
• ABC
• BBC
  
• El Rancahuaso
  

Cortu Llamazares

Esti día vi a Gaspar Llamazares quemar una semeya de la Familia Real nun cortu virtual en Second Life. Pa cortu, Gasparín. Escarabáyaseme'l pelleyu al pensar nuna república col talibán Llamazares de presidente. Nunca'l comunismu español pudo llegar a menos. Amás, esi cosu que llamen Izquierda Xunida (que nin ye uno nin lo otro) aseguró nun comunicáu que nun pretende "de manera directa nin indirecta actuar de forma ofensiva escontra naide, nin escontra nada, seya una persona pública a títulu individual o una institución". Una de dos: o piensen que somos mordias, o los mordias son ellos. El panorama políticu español ta ermu. ¿Ú Julio Anguita?

Quiero ser progre

Esti día quiero ser progre. Dióme perhí. Quiero ganar 78.791,28 euros (13.109.766 pesetes) al añu. Pa los de lletres: más de un millón al mes. Un sueldín curiosu, pa dir tirando. Quiero tener coche oficial, pero un coche grandón, d'espatarrar, y gastos pagos. Quiero un plan de pensiones pa cobrar la xubilación másima en trabayando 11 años (los 35 namai se-y esixen a la plebe). Quiero vivir nun áticu de 220 metros cuadraos, nel centru de Madrid, gratis total, que pagar alquiler ye de probetones. Quiero disponer de 250.000 euros (41,6 millones de pesetes) de dineru públicu pa reformar el pisín como me pete. Y, sobre tóu, quiero que l'Estáu me regale 11.000 euros (1,8 millones de pesetes) pa camudar el mobiliariu del escusáu. Pa cagar a gustu, como de xuru yá lo fai el ministru de Xusticia, Mariano Fernández Bermejo, progre ente los progres.

Pensamientu únicu

Esti día un rebañu d'independentistes gallegos insultó, escorrió y intentó da-y en focicu a la presidenta del PP del País Vascu, María San Gil, que foi a dar una conferencia na Universidá de Santiago. Tola razón (discutible siempre) que pudieren tener los presuntos galleguistes pa criticar a la política vasca perdiéronla coles formes. Truñar ye propio de vaques resabiaes y de nazis. Esi proceder ye de fascistes. Porque fascista, naide lo escaeza, ye'l que quier eliminar pola fuercia el pensamientu del vecín. Fascistes son los que nun acepten más que'l so pensar. Entós, estos independentistes, que de xuru se creyen d'izquierdes, defenden el pensamientu únicu. ¡Demontres!, talamente como los capitalistes a los que tanto critiquen. La política tien estes coses. Nel otru lláu, ta'l demócrata, que ye'l que respeta les idees de los demás, por mui separtaes que tean de les de só. El demócrata fala, debate, discute, confrontia... pero respeta l'Estáu de derechu y al adversariu políticu. Lo peor ye que les formes d'esos que s'autoproclamen galleguistes, intolerables nuna democracia, perxudiquen a los demás independentistes, a los demócratas. Habelos, hailos. Otra cosa ye andar al buscu de dinamitar l¡Estáu de derechu. Eso yá sedría otru cantar.

Un trunfu grandiosu

Esti día lleo que "Camín de cantares", programa televisivu presentáu por Xosé Antón Fernández "Ambás", dirixíu por Ramón Lluis Bande y producíu por Ámbitu Audiovisual, tuvo'l sábadu pasáu una audiencia de 28.000 espectadores, lo que supunxo un 30,2 por cientu de share. Esta cifra fixo que la TPA liderara esi horariu y fora la cadena más vista n'Asturies, por delantre de les estatales y les locales. Ye un trunfu grandiosu qu'un programa dedicáu a los cantares tradicionales d'esti pequeñu país, y que se desarrolla n'asturianu, algame tales cifres. Estes coses presten.

El mocín de la película

Esti día nun puedo más que siguir cola tema de los obispos, porque lo que lleo nun me lo lleva'l cuerpu. Hai coses ¡ncompatibles dafechu. Como declarase demócrata y, a la par, esixir "la disolución definitiva d'esa cosa llamada Conferencia Episcopal". Son les ocurrencies d'un tal Alberto San Juan, al que-y dieron el caberu premiu "Goya" al meyor actor protagonista. Un rapaz permodernu y megaguai, que se creye mui progre. Pa entendenos, el mocín de la película.

Les cheques, la llei de peligrosidá social, el fascismu y l'estalinismu, a Dios gracies, son coses del pasáu, anque'l presuntu actor nun lo sepa. Un demócrata, paezme a min, defende la so opinión, respeta les de los demás, y hasta tá abiertu a camudar d'idea si dalgún-y ofrez meyores razones y argumentos que los propios. La Conferencia Episcopal puede dicir misa (ye lo suyu, dichu seya de pasu). Los obispos tienen derechu a dicir lo que-yos gusta y lo que non. Tienen derechu a pidir a los sos asociaos que voten a esti o a aquelli. Y a oponese al albuertu, al divorciu o a les carreres de panoyes. Y Alberto San Juan, por supuestu, tien derechu a criticar lo que-y dea la gana. Pero esixir la disolución de la Conferencia Episcopal (o amenazala con represalies, como fai el PSOE) paez un exemplu de actitú antidemocrática, soberbia, sectaria. ¿Tanto falar de tolerancia pa esto?

Alberto San Juan y tola corte de seudoprogres del mundu del cine español deberíen pasar pol mesmu aru que la Ilesia. Que-yos quiten toles subvenciones y tola maturranga que tienen montada. Y que pongan na declaración de la renta un apartáu onde poner una crucina, pa que cada contribuyente decida si da o nun da un tantu por cientu de lo que paga a Facienda pal cine español. Porque agora nun hai crucina que vala: oblíguennos a toos a pagar relixosamente (entiéndase la ironía) toles películes, seyan bones o males. Y a la vista de les ventes d'entraes en 2007, una de dos: o les películes españoles son más bien maluques, o traten temes que nun interesen a les espectadores. Porque nun las va ver nin Dios. Claro que, ¡como va dir a veles, si los que les faen quieren disolve-y la Conferencia Episcopal!

Remedando a Voltaire, nun toy d'alcuerdu cola mayoría de les coses que prediquen los obispos, pero defenderé con tol llombu el so derechu a espresales. Y tamién el de los demás, incluíu el mocín de la película, a nun face-yos nin putu casu. Pero dende'l respetu.

Una de obispos

Esti día formóse un xaréu que metía mieu a cuenta de que los obispos españoles pidieron el votu p'aquellos partíos y programes "compatibles cola fe y les esixencies de la vida cristiana". O lo que ye lo mesmo, la Ilesia quier que los católicos voten a los que s'opongan al albuertu y a la negociación cola ETA y a los que rechacen coses como'l matrimoniu homosexual y la asignatura de "Educación pa la Ciudadanía". El PSOE contestó calificando de "inmoral" que los obispos utilicen el terrorismu "pa facer política".

Nun entiendo nada. Pero si esto ye mui fácil: la Ilesia ye un club. Y como tolos clubs tien unes normes. Si ún pertenez al club, debe respetar eses regles, o marchar. Hai otres ilesies, otres relixones, otres creencies, l'agnosticismu, l'ateismu... Clubs d'esti tipu onde metese sobren. Y si ún nun pertenez al club, daran-y igual les sos regles, puestu que nun lu afectan. Un exemplu: nuna asociación de non fumadores los socios, digo yo, tendrán que ser nun fumadores. Los que nun seyan socios podrán facer lo que-yos dea la gana. Y los fumadores, loxicamente, nun podrán pertecener a esi club. Quiero dicir que si ún nun pertenez al club de los obispos, qué demónganos- y importa lo que digan. Pero, per otru llau, si yes católicu y queres siguir nel club, tendrás que face-yos casu, o marchar. Menudu xeroglíficu.

Resumiendo: nun acabo d'entender les crítiques a los obispos. ¡Que digan misa! Fara-yos casu el que sea sociu d'esi club. Los demás votarán lo que-yos pete. Pero quede claro que los obispos, como los fontaneros, los fumadores o los socios del Sporting de Xixón tienen derechu a opinar y a pidir el votu pa quien-yos dea la gana. Y los demás a nun face-yos nin putu casu, por supuestu.

¡Ah! y los que nun ten d'alcuerdu colos cures (que tamién tienen derechu a opinar, faltaría más) tiénenlo perfácil: l'apostasía. Lo que nun puede ser ye que un fumador quiera facese sociu d'un club de non fumadores o obligalos a que camuden les sos regles. Eso, como diría mio tíu Nel, son ganes de tocar los coyones.

Falta de piedá

Esti día vi charrar na televisión a un individuu qu'atropelló y mató va tiempu a un rapacín que diba en bicicleta. Esti ¿home? reclámayos agora a los pas del probe chaval 20.000 euros, polos daños que causó'l cuerpu del muertu al so vehiculu, un Audi A8. Si hai un mal qu'afeuta a esti mundu actual ye la falta d'humanidá, la falta de piedá (nel sentíu humanista del términu). Nada hai peor que nun poder ponese nel llugar del próximu. Nada peor que ser incapaz d'entender los sentimientos del "otru". Nada peor que la egolatría, l'egoismu. Nun sé si el conductor que mató al guah.e tendrá o non derechu a cobrar los daños del coche. Nun sé lo que sentenciará'l xuez. Pero sí sé que nun se debe xurgar na ferida de los que sufrieron el peor de los tormentos: perder un fíu.

La pita ciega

Esti día quedé plasmáu al lleer que'l Gobiernu d'Andalucía quier camudar les regles de los xuegos tradicionales infantiles pa que dexen de ser sexistes. El Instituto Andaluz de la Mujer (IAM) distribuyó por cientos de escueles y centros de Secundaria y Bachilleratu d'Andalucía un manual tituláu "Nuevas formas de jugar: guía para transformar los juegos tradicionales", nel que llama a los profesores a favorecer la paridá sexual nel ociu de los escolinos. El oxetivu ye evitar que la eleición de los xuegos reproduza les desigualdaes de xéneru. Estes son dalgunes de les indicaciones:

"Debemos formar grupos heterogéneos, donde chicas y chicos interactúen y participen de forma equilibrada".

"Debemos evitar el liderazgo de una persona o un grupo de personas. Se trata de aprender a cooperar en igualdad".

"Hay que tener en cuenta las habilidades y posibilidades de cada participante eliminando los roles tradicionales que desempeñaban los chicos y las chicas y atendiendo a sus circunstancias personales".

"Evitaremos la expresión de quién juega bien y quién juega mal y nos centraremos más en la forma de participación".

"Para cada juego haremos grupos, no utilizaremos lo individual".

"La finalidad del juego no ha de ser ganar sino participar igualitariamente".

Estos chiflaos (o non tanto) dan instrucciones pa xugar, por exemplu, a la pita ciega, d'un móu, según ellos, nun sexista y sin ganadores nin perdedores. Too esto, claro ta, distribúyese nos centros educativos públicos. Xustamente onde nun estudien los fíos de los dirixentes políticos qu'inventen estes babayaes. Porque los sos fíos, los fíos de los políticos que güei nos ¿gobiernen?, tanto los del PSOE como los del PP, y tengo miéu qu'hasta los de IU, estudien en colexos privaos, nos meyores colexos, nos más caros. ¿Y por qué?, preguntará dalgún. Yo tengo dos teoríes y, de verdá, nun sé con cuala quedame. La primera ye que son tontos, mui tontos, que-yos falta un fervor. La segunda ye que son llistos, mui llistos, que-yos sobra una garciellada. Como la esplicación de la primera teoría ye perfácil, voi centrame na segunda. Los políticos -la clas dominante- quieren dexalo too atáo y bien atáo pa que los sos fíos seyan los gobernantes del mañana. P'algamalo interesa que'l pueblu llano, la plebe, furrule como un rebañu, qu'obedeza. Oveyes, quieren oveyes. Y por eso insisten tanto en que lo importante nun ye ganar, sinón participar. Ellos saben que'l mundu que los rapazos alcontrarán cuando dexen el güevu ye mui otru: reina la competencia xabaz. Por eso prefieren un país de mayoría analfabeta, nel que namás los sos fíos tean preparaos y sepan competir y ganar. Pa que sigan siendo élite.

Ya puestos, deberíen camudase les regles del fútbol pa que dexe de ser sexista. Primero: mitá homes, mitá muyeres. Y como el númberu de xugadores, once, ye impar... na portería, envede un porteru, dos: un machu y una fema. También un árbitru y una árbitra. Y los xueces de llínia, unu muyer y otru home. Habrá qu'obligar a los equipos a que tengan entrenador y entrenadora, masaxista y masaxistu, presidente y presidenta, y, por supuestu, el mesmu númberu de testículos que d'ovarios na xunta directiva. Otru día falaremos de les cuotes que se deberíen acutar pa los emigrantes sin papeles, homosexuales, negros (¿puede decise negros ensín que suene a racista?), minoríes relixoses, prostitutes, celíacos, fumadores pasivos, siguidores del "Tomate", accionistes del Sporting, grandes de España, autores de blogs n'asturianu... Perimportante: nun se cuntarán los goles. O si se cuenten, farase pa los dos equipos por igual, independientemente del que marque. Así tolos partíos acabarán en empate. Porque lo importante ye participar. ¿O vas decime que non?

Yo, de verdá, está supuesta progresía paleta, analfabeta, hortera y fata nun acabo d'entendela. Sedrá pol golpe que me di de pequeñu na cabeza.

Una llingua menos

Esti día morrió una tal Marie Smith Jones, la última nativa d'Alaska que falaba la llingua eyak. Tenía 89 años y lluchó munchu tiempu escontra les grandes empreses madereres que talen bosques naquelles tierres. Descansen en paz la muyer y la llingua. Hai otres 3.000 llingües en tol mundu en peligru d'estinción. Y cada día muerren unes 3.000 persones que falen unu d'estos idiomes. Los políticos, que deberían defender esi patrimoñu cultural, dedíquense mientres tanto a meter perres en bolsu.

Feliz Navidá

Feliz Navidá. Heba salú, paz y oficialidá.

Cuba y el tiempu

Esti día salió un portavoz oficial del réxime lleendo un carta de Fidel Castro al pueblu cubanu na que'l de les barbes dicía que nun hay que "aferrase" al poder. ¡Home! Bien pudo dicilo va tiempu, porque'l tal Castro lleva ¡48 años! "aferráu" a la xefatura l'estáu. Sedrá que nun-y pasó hasta agora pola tiesta. Ye normal, el tiempu vuela, como los páxaros.

Rara imaxe

Esti día vi a Chávez, el llinguateru presidente venezolanu, falando pola tele depués de perder un referendum. Llamóme l'atención, más que les sos palabres, la so imaxe, calteniendo una edición "mini" de la constitución bolivariana na mano drecha. Garrábala, o asina me lo paeció, como los telepredicadores garren la Biblia. Yera la de Chávez una pose relixosa. Falaba de aquella norma como si fora trescendente, casi divina. Encima, o meyor dichu detrás d'elli, veíase el típicu cuadru de Bolivar, que nesi contestu paecioseme permuncho a Xesucristo o a cualquier santu del Cielu. De verdá que foi una escena rara. Paecía Chávez más un cura que un políticu (presuntamente) socialista, no alto d'un altar. A falta de Dios, Simón Bolivar; a falta de Biblia, constitución bolivariana. Ye siempre lo mesmo, aunque dalgunos quieran pintalo diferente.

Tocar los coyones

Esti día creo que la decisión del Gobiernu socialista de quitar los rótulos n'asturianu de delles conseyeríes ye'l meyor exemplu del fondu despreciu qu'estos personaxes sienten pola llingua del país. Nun sé onde tarán toos esos socialistes, los Trevín y compaña, que presumíen d'asturianistes. ¿Nun se-yos cayerá la cara de vergoña? Estos antiasturianistes militantes recurren siempre al argumentu de que n'Asturies nun hai conflictu llingüísticu, y que por eso nun fai falta nin oficialidá, nin normalización. Tal paez que quieren dicir que tendría qu'haber conflictu. Lo mesmo ye que hai que radicalizase pa que faigan casu. Lo mesmo ye que la que llamen "Opción Valencia" nun ye l'adecuada, y que hai que tirar pela "Opción Euskadi". Lo mesmo ye que namai reaccionen cuando-yos entra'l miéu. Lo mesmo ye que namás fain concesiones a los violentos. Pues furrular asina ye perpeligroso. Ye penoso tener estos gobernantes que nun respeten nada y que solo busquen medrar, ganar perres y tocar los coyones.

Fiches policiales

Esti día andaben ensiñando peles televisiones amarielles la ficha policial d'Isabel Pantoja, tonadillera mayor del reinu. Los que-yos dieren los documentos a los presuntos periodistes -seguramente sedríen policíes- son más delincuentes que la cantante, a la que entá nun xulgaren y que, polo tanto, ye inocente. Hai demasiaes persones n'España que viven de la mierda y del morbu. Hai demasiada xente a la que-y val too con tal de medrar y ganar perres. Son lo peor.

Encuestes

Esti día digo que si, como indiquen les encuestes, más d'un cuarenta por cientu de los asturianos votaríen agora mesmu nes eleiciones xenerales al PSOE y otru tantu daríen-y el votu al PP ye que l'ochenta y tantos por cientu de los ciudadanos d'esti país ta d'acuerdu colo qu'hai y colo que puede haber, que vien a ser lo mesmo. Aunque esto nun tuviera igua nun hai que desanimase. A la fin lluchar ye vivir.

Los asturianos, tan contentos

Esti día veo que los resultaos de les eleiciones lo déxen bien claro: los asturianos tan encantaos colo qu'hai. Quédase ún ababayáu, pero eso ye lo que nos toca. Amén.

Vida

Esti día dime cuenta de que yera verdá: había vida depués de les eleiciones.