30.1.09

La crisis que nos afuega

La crisis que nos afuega nun ye más que falta de confianza, falta de fe. Los bancos nun se fíen de los clientes. Los clientes nun se fíen de los bancos. Los ciudadanos nun se fíen del Gobiernu. El Gobiernu nun se fía de los ciudadanos. Les empreses nun se fíen del futuru. El futuru nun ye fiable...

El capitalismu, lo mesmo que'l socialismu, nun dexa de ser otra relixón. Enllena de dogmes. Cuando falta la fe lleguen les duldes. Y con elles... la crisis que nos afuega.

29.1.09

Indecencia

Esti día hai 13.896 millones de razones pa esi titular.

Ye'l beneficiu netu que sumaron, l'añu pasáu, el Bancu Santander (8.876 millones d'euros, 1,47 billones de pesetes) y el BBVA (5.020 millones d'euros, 835.257 millones de pesetes). Pa marease.

Y el Gobiernu ofreciéndo-yos perres (les de tolos ciudadanos, les nuestres) pa que la crisis nun los afecte.

Y enfrente millones de paraos, empreses zarraes, hipoteques, necesidá...

Ellos dirán "demagoxa". Yo digo "indecencia".

23.1.09

Cuatro gatos

...Y lo mesmo tamos equí cuatro gatos mal cuntaos, mirándonos pal embeligu, dando vueltes y revueltes a una llingua que igual, sin enteranos, dexó d'esistir va sieglos.


Y lo mesmo escribimos pa naide, porque solo nos lleemos nosotros mesmos. Los unos a los otros. Tú a mí, yo a tí...


Y lo mesmo nun val pa nada tolo que facemos, convencíos de que ye xusto y necesario, por un idioma que namás falamos nosotros, tú, yo, esti y aquelli...


Cuatro gatos mal cuntaos.

21.1.09

Les cuentes d'Obama

Esti día oyimos el primer discursu d'Obama como presidente de los Estaos Xuníos. Naide dulde de que taba perpensáu. De la primer a la cabera pallabra. Pero, ¿qué pallabres fueron les más repetíes y cuales pronunció poco, o nun pronunció? Estes son les cuentes d'Obama.

13 vegaes:
Nuevu (-a, -es, -os).

12 vegaes:
Nación (-es).

10 vegaes:
Trabayu (-ar), facer.

9 vegaes:
Nosotros.

8 vegaes:
País (-es), xeneración (-es), güei.

7 vegaes:
Estaos Xuníos.

6 vegaes:
Pueblu (-os), muyeres, mundu, grande (-s, -ura).

5 vegaes:
Dios, llibertá, alantre, gobiernu (-os).

4 vegaes:
Estauxuniense (-s), crisis, confianza, esperanza, vida, poder (-osu), riqueza, camín, bien (-es), mal (-es), peligru, tierra.

3 vegaes:
América, paz, economía, prosperidá, home (-s), amigu (-os), promesa (-s), serviciu (-os), idea (-les), vieyu, humilde (-á), xuramentu, esfuerzu (-os), responsable (-ilidá), construyir, seguridá, gracies.

2 vegaes:
Ciudadanos, musulmán (-es), guerra, neños, enemigu (-os), camudar, sanidá, intereses, emplegu (-os), xenerosidá, cooperación, antepasaos, protexer, odiu, fuercia, ambiciones, oportunidá (-es), patriota (-ismu), planeta, amenaza, sangre, digna (-idá), virtú, humanu (-a), política, futuru (-a).

1 vegada:
Comunismu, felicidá, xusticia, ciencia, raza, probe, cultures.

0 vegaes:
Europa, igualdá, recuperación.

Delles frases d'Obama


Esti día delles frases d'Obama:

  • Si nun hai un güeyu vixilante, el mercáu puede salise de control.
  • Estaos Xuníos ye amiga de cada nación, de cada home muyer y neñu que quiera un futuru de paz y dignidá, y tamos preparaos pa retomar el lideralgu.
  • Siguimos siendo la nación más próspera y poderosa del mundu; los nuesos trabayadores nun son menos productivos que cuando entamó la crisis; la nuesa mente nun ye menos creativa; los nuesos bienes y servicios nun son menos necesarios que va una selmana, un mes o un añu; la nuesa capacidá mantiense.
  • Llegó'l momentu d'abrazar la idea noble de que toos somos iguales, llibres y merecemos la oportunidá de dir a la gueta la felicidá.
  • La pregunta que nos facemos güei nun ye si'l gobiernu ye mui grande o mui pequeñu, sinón si trabaya. Si ayuda a que les families alcuentren emplegos decentes, si-yos da'l cudiáu que necesiten y una xubilación digna. Si la respuesta ye "sí", siguiremos p'alantre; onde la respuesta seya "non", los programes acabaránse. Los que manexamos el dineru públicu debemos responder de ello -gastar con prudencia, camudar les males zunes y facer el nuesu trabayu a la lluz del día-, porque solo asina podremos reestablecer la necesaria confianza ente'l pueblu y el so gobiernu.

El discursu completu equí:

17.1.09

Chancletos

Y a too esto Ovidio y Vicente, Pinín y Pinón, riéndose como chancletos.

(Les caricatures son emprestaes de La Nueva España)

Derechos

Esti día una xueza de l'Audiencia Nacional espetó-y a un asturianu al que xulga por un presuntu delitu d'estragos terroristes, en gráu de tentativa, lo que sigue: "El bable no es ningún idioma oficial, así que hable usted en castellano. No existe el derecho a hablar en la lengua que a uno le dé la gana".


Quédome ablucada. Entós, si una persona, pongamos, d'ochenta años tien que dir a declarar a un xuiciu y nun sabe falar más que n'asturianu o esi ye l'idioma nel que meyor s'esplica... ¿qué faríen con ella, torturaríenla hasta qu'aprendiera castellanu por ciencia infusa? Y si a mí me sal de onde salen estes coses declarar na llingua de mio padre y mio madre, de los mios güelos y les mios güeles, nel mio idioma, ¿que faríen comigo, cortame´l gargüelu?


Entrúgome que diría esa mesma xueza -y tantos otros- si un castellanu-falante de los Estaos Xuníos tuviera que dir a xuiciu y non lu dexaran espresase na llingua de Cervantes, col cuentu de que: "el castellanu nun ye dengún idioma oficial, así que fale usté en inglés. Nun esiste'l derechu a falar na llingua que a ún-y dé la gana". De xuru que se llevaríen les manes a la tiesta. Polo que se ve esi derechu, n'España, tiénenlu namás los que falen castellanu, catalán, vascu, gallegu, valencianu, mallorquín, aranés y cualaquiera otra llingua del mundu mundial, dende l'arabe al servu-croata (toos con traductor gratis, por supuestu), menos l'asturianu, que lo mesmo nin esiste. Colo qu'esto que facemos usté (lleer) y yo (escribir) n'asturianu debe ser cosa de mordias.


Yo nun sé qué fizo o dexó de facer esi individuu al que xulguen na Audiencia Nacional. Nun sé si merez la cárcel o la llibertá. Nun sé si ye terrorista o inocente. Eses decisiones deben tomales los xueces. Lo que sí sé ye que si nun-y dexen declarar na so llingua esto nun ye un Estáu de derechu, eso nun ye xusticia y aquello ye una pantomima. 


Una preguntina más: ¿Esistirá'l derechu a escribir na llingua que a ún-y dé la gana?

16.1.09

El "milagru" irlandés

Esti día dígovos que la cosa ta curiosa. Resulta que nun va tanto lleíemos nos papeles maraviyes d'Irlanda, un país que pasara nunos años de ser de los más probes d'Europa a tar na cabeza en renta per cápita. Lo mesmo que na vecina Galicia, n'Asturies los periódicos falaben del "milagru irlandés" y poníen a la vieya Eire como exemplu a siguir pa sacar al país de la tristura y el fracasu.


Hasta'l periodista  Thomas Friedman, santu pa unos y diañu pa otros, publicó en xunu de 2005 un artículu en "The New York Times", tituláu "The end of the rainbow", nel qu'esplicaba la so visión del porqué del "milagru celta". Friedman, fiel al so apellíu, achacábalo too a les polítiques lliberales. Y hasta daba les claves pa calcar el milagru irlandés: "Make high school and college education free; make your corporate taxes low, simple and transparent; actively seek out global companies; open your economy to competition; speak English; keep your fiscal house in order; and build a consensus around the whole package with labor and management -then hang in there, because there will be bumps in the road- and you, too, can become one of the richest countries in Europe".


Pero, ¡ai amiguín!, agora llegó'l tiempu de les vaques flaques. El miércoles pasáu entró-yos el pánicu a los inversores y analistes internacionales ante la posibilidá de que la verde Irlanda tenga que pidir ayuda al Fondu Monetariu Internacional (FMI) p'afrontar el so fondísimu endeudamientu. Resulta que la hasta va bien poco milagrosa Irlanda quiso caltener con dineru públicu el so sobredimensionáu sistema bancariu. L'aumentu del gastu públicu y el derrumbe del sector inmobiliariu fizo cayer la calidá de la deuda irlandesa. En crisitianu: lo d'Irlanda yera una burbuya, un bluf.


Les asemeyances ente Irlanda y España son evidentes, sobre too no que se refier al sector inmobiliariu.


Y en estes andamos, yá sin espeyu, nin guía, nin referente. Perdíos na inmensidá de la crisis. Nin Irlanda, nin el lliberalismu, nin el marxismu... Nada furrula. Claro que n'Asturies tenemos ventaya: equí nun furrula nada dende'l tiempu de maricastaña. Poro, tamos JASP (jodíos, anque sobradamente preparaos) pa lo que venga. Que daqué vendrá.

11.1.09

Obispu de doble cara

Esti día entérome que se va l'obispu Carlos Osoro pa Valencia. Diz que lleva deprendiendo valencianu unes selmanes pa llevar l'Evanxeliu a eses tierres. Esti puntu, místicu y conservadorón, ye'l mesmu que nun pronunció nin una pallabra n'asturianu nos siete años que lleva nesti país. Y ye tamién el mesmu que prohibió que s'emplegara la llingua asturiana nel funeral del cura Fierro Botas.

¡Hale, con Dios! Allá ta bien l'Obispu de la doble cara. Que-y den horchata. Amén.

3.1.09

Canción d'iviernu

Esti día nada meyor que un bon poema pa entamar l'añu. Esti, por exemplu:


Canción d'iviernu

--

Canten, Canten.

¿Onde canten los páxaros que canten?


Ya llovió. Tovía les cañes

tan sin fueyes nueves. Canten. Canten

los páxaros. ¿Onde canten

los páxaros que canten?


Nun tengo páxaros en xaules.

Nun hai neños que los viendan. Canten.

El valle ta mui lloñe, Nada...


Yo nun sé onde canten

los páxaros (canten, canten),

los páxaros que canten.

--

Juan Ramón Jiménez