Feliz Navidá

Feliz Navidá. Heba salú, paz y oficialidá.

Cuba y el tiempu

Esti día salió un portavoz oficial del réxime lleendo un carta de Fidel Castro al pueblu cubanu na que'l de les barbes dicía que nun hay que "aferrase" al poder. ¡Home! Bien pudo dicilo va tiempu, porque'l tal Castro lleva ¡48 años! "aferráu" a la xefatura l'estáu. Sedrá que nun-y pasó hasta agora pola tiesta. Ye normal, el tiempu vuela, como los páxaros.

Rara imaxe

Esti día vi a Chávez, el llinguateru presidente venezolanu, falando pola tele depués de perder un referendum. Llamóme l'atención, más que les sos palabres, la so imaxe, calteniendo una edición "mini" de la constitución bolivariana na mano drecha. Garrábala, o asina me lo paeció, como los telepredicadores garren la Biblia. Yera la de Chávez una pose relixosa. Falaba de aquella norma como si fora trescendente, casi divina. Encima, o meyor dichu detrás d'elli, veíase el típicu cuadru de Bolivar, que nesi contestu paecioseme permuncho a Xesucristo o a cualquier santu del Cielu. De verdá que foi una escena rara. Paecía Chávez más un cura que un políticu (presuntamente) socialista, no alto d'un altar. A falta de Dios, Simón Bolivar; a falta de Biblia, constitución bolivariana. Ye siempre lo mesmo, aunque dalgunos quieran pintalo diferente.

Tocar los coyones

Esti día creo que la decisión del Gobiernu socialista de quitar los rótulos n'asturianu de delles conseyeríes ye'l meyor exemplu del fondu despreciu qu'estos personaxes sienten pola llingua del país. Nun sé onde tarán toos esos socialistes, los Trevín y compaña, que presumíen d'asturianistes. ¿Nun se-yos cayerá la cara de vergoña? Estos antiasturianistes militantes recurren siempre al argumentu de que n'Asturies nun hai conflictu llingüísticu, y que por eso nun fai falta nin oficialidá, nin normalización. Tal paez que quieren dicir que tendría qu'haber conflictu. Lo mesmo ye que hai que radicalizase pa que faigan casu. Lo mesmo ye que la que llamen "Opción Valencia" nun ye l'adecuada, y que hai que tirar pela "Opción Euskadi". Lo mesmo ye que namai reaccionen cuando-yos entra'l miéu. Lo mesmo ye que namás fain concesiones a los violentos. Pues furrular asina ye perpeligroso. Ye penoso tener estos gobernantes que nun respeten nada y que solo busquen medrar, ganar perres y tocar los coyones.

Fiches policiales

Esti día andaben ensiñando peles televisiones amarielles la ficha policial d'Isabel Pantoja, tonadillera mayor del reinu. Los que-yos dieren los documentos a los presuntos periodistes -seguramente sedríen policíes- son más delincuentes que la cantante, a la que entá nun xulgaren y que, polo tanto, ye inocente. Hai demasiaes persones n'España que viven de la mierda y del morbu. Hai demasiada xente a la que-y val too con tal de medrar y ganar perres. Son lo peor.

Encuestes

Esti día digo que si, como indiquen les encuestes, más d'un cuarenta por cientu de los asturianos votaríen agora mesmu nes eleiciones xenerales al PSOE y otru tantu daríen-y el votu al PP ye que l'ochenta y tantos por cientu de los ciudadanos d'esti país ta d'acuerdu colo qu'hai y colo que puede haber, que vien a ser lo mesmo. Aunque esto nun tuviera igua nun hai que desanimase. A la fin lluchar ye vivir.

Los asturianos, tan contentos

Esti día veo que los resultaos de les eleiciones lo déxen bien claro: los asturianos tan encantaos colo qu'hai. Quédase ún ababayáu, pero eso ye lo que nos toca. Amén.

Vida

Esti día dime cuenta de que yera verdá: había vida depués de les eleiciones.

Ocho años, noventa kilos

Esti día lleí: "Ocho años, noventa kilos". Yera'l titular d'un reportax sobre un guah.e pergordu qu'apaecía ayeri nun periódicu del país. Depués d'una llarga y dura batalla llegal, la madre, una muyer con problemes depresivos, pudo caltener la custodia del xigantescu rapazón. Los servicios sociales de la Ingalaterra acusábenla de "neglixencia allimentaria". Menos mal que trunfó el sentíu común. Porque ocúrrenseme dos preguntes. La una: ¿El rapaz, zampón de marca mayor, ye feliz comiendo tol día pataques frites, comides precocinaes y llambionaes de tóu tipu? y la otra: ¿Sedría'l críu más feliz comiendo namás verdures y frutes y, sobre tóu, taría más contentu si lu allevaren lloñe de la madre? Seguru que'l chaval ye feliz xintando a tóu papu, y segurísimu que quier siguir viviendo cola so ma. Asina que cualquier decisión tien que pasar porque el fíu y la ma sigan xuntos. Porque esti problema, ta claro, nun ye sólo del rapaz. Ye familiar. Y polo tanto requier una solución global. Lo mesmo hai qu'aprende-y a la madre cómo se-y apriende a un guah.e a comer sano. Habrá qu'educalos a los dos, col firme oxetivu de que dambos seyan, si ye posible, presones más felices y más sanes.

El cuentu de IU

Esti día IU diz que si la llexislatura que vien ye la de la reforma l'Estatutu sedrá inconcebible qu'heba un pautu de gobiernu col PSOE sin cooficialidá. ¿Sedrá verdá d'esta, o trataráse otra vegada del mesmu cuentu de siempre? Les decepciones, con IU, son continues. Ye la única formación política con representación na Xunta Xeneral que defende nos sos programes electorales la oficialidá de la llingua asturiana. Pero a la hora de la verdá, cuando de veres tien posibilidá d'imponese o de plantase, cuando puede dexar col culu al aire a Areces y a la so "troupe", cuando allega'l gobiernu, nun acaba de coyer el sarten pol mangu, y dedícase namás a pasear nos Volkswagen, que más que Phaeton paecen de "phantom" (pantasma). Cámbaros paceremos, porque p'atrás vamos.