Esti día armóse la tremolina porque'l Papa Benedito XVI dixo en Camerún que los preservativos namás agranden el problema del sida. Salió entós el secretariu xeneral de Sanidá del Gobiernu español, José Martínez Olmos, y señaló que'l Papa ta "mui mal aconseyáu", polo que-y recomendo entonar el "mea culpa" y rectificar les sos recomendaciones, pa faceles "sobre la base de la evidencia científica". Faime gracia esí afán d'unu y d'otru por indica-y a tol mundu lo que tien que dicir y que pensar.
El Papa puede dicir lo que quiera, y el restu de los mortales tiene dos opciones: face-y casu o pasar d'elli. Supónse que los creyentes siguirán los sos recomendaciones (o non), y que los que nun creyen, o nun creyen lo mesmo que Benedito XVI, les sos pallabres entrarán-yos por un oyíu y saldrán-yos pol otru (o non). El Papa, cuando fala d'estes coses, diríxese a los católicos, que lu reconocen como'l so xefe espiritual y relixosu. Más que nada porque dirixise a los non-católicos sedría una babayada, pues pa ellos nun tien denguna autoridá, nin moral, nin relixosa". Asi que'l Papa fai lo que tien que facer. Fai bien.
El tal Martínez Olmos tiene tamién derechu a dicir lo que quiera, a criticar al Papa y hasta a asegurar que'l preservativu ye'l meyor inventu de la historia. Lo que nun me paez bien ye qu'esixa al Papa que rectifique. Y más que quiera que les manifestaciones de la másima autoridá de la Iglesia católica (apostólica y romana) se basen na "evidencia científica". Ye como si'l Papa-y esixera al secretariu xeneral que basara les sos pallabres na fe y nel temor de Dios.
Martínez Olmos nun fala como dirixente del PSOE, sinón como integrante d'un gobiernu que lo ye de tolos ciudadanos, los creyentes, los non creyentes, los ateos y los agnósticos. Asina que peme que los sos manifestaciones nun son acertaes.
Lo mesmo había que pidi-y a Martínez Olmos que rectificara, pero entós cayeríemos nel mesmu error qu'elli. Asina, que diga lo que-y pete, y que caún-y faiga'l casu que-y apeteza. Como al otru.
A mi nin m'afecta lo que dixo Xuan, nin m'afecta lo que dixo Pepe. Nun necesito, de momentu, guíes; nin espirituales, nin políticos.
