20.12.09

Escaecimientu

Esti día dixo Rajoy, esi gallegu que sal tanto pola tele, que pa ser "feliz" en Navidá "hay qu'escaecese de qu'esiste Zapatero", esi lleonés que tanto sal pola tele. Yo voi escaeceme del gallegu, del lleonés y de tolos que salen tanto pola tele.

9.12.09

Copenhague y les putes

Esti día lleo en The Daily Telegraph que los políticos que participen na "cume" de Copenhague, onde se supón que se negocia l'alcuerdu caberu pa "salvar" al mundiu del cambéu climáticu, usen 1.200 limusines y 140 jets privaos, colo que xenerarán más diósidu de carbonu qu'una ciudá de 200.000 habitantes. Los "espertos" y líderes mundiales que quieren "salvar" al Planeta faen un canciu a la "sostenibilidá" y a la "progresía": zamparán tonelaes de vieires, foie gras (non, del de lata, non) y caviar.

Y tamién tan les trabayadores del sesu, eses qu'anantes llamaben putes... El sindicatu de trabayadores del sesu de Dinamarca, enfadáu por una recomendación oficial a los delegaos de la Conferencia escontra'l Cambéu Climáticu pa que nun compraren sesu, anunció que les sos "trabayadores" ufiertarán sesu llibre a tóu el que tenga un pase de delegáu. ¡Cómo lo pasen los "calentólogos"! Un tal Pablo Molina -de la contra, claro- diz que ellí tamién quier salvar al mundiu. Yo non: nun me gusten nin les vieires nin el caviar, y puedo vivir sin foie gras y sin putes.

20.11.09

Tragaremos

Esti día lleó que'l Gobiernu Zapatero diz qu'España, como país, nun pagó'l rescate del "Alakrana". Tragaremos, pero... ¿Y como nación? ¿Y como Estáu? ¿Y como unidá de destín no universal? ¿Y como bocadillu de chorizu?...

7.11.09

La SGAE, lalará, lalará

Esti día lleo que la SGAE pide-y a un peluqueru qu'apoquine por poner la radio nel so local. Toi que nun vivo porque tengo'l vezu d'echar cantaraes na ducha. El día menos pensáu pídenme cuentes. Lalará, lalará...

9.10.09

Müller vs. Oz


Tovía hai lluz na casa'l carpinteru. Winddisch paróse. El cristal de la ventana relluz. Reflexa la cai. Reflexa los árboles. La imaxe traviesa la cortina. Entra n'habitación pente los raminos d'encaxe. Xunta la estufa d'azulexos hai una tapa de caxa muertu apoyada na parede. Espera la muerte de la vieya Kroner. El so nome apaez escritu nella. Anque hai muebles, l'habitación paez vacía ente tanta claridá.

(Fragmentu de "L´home ya un gran faisán nel mundu", de Herta Müller, ganadora del premiu Nobel de Lliteratura de 2009).


Na caí Zacaríes, cerca de nos, vivía una neña llamada Esti. Pela mañana, sentáu na mesa la cocina, mientres almorzaba una tayada de pan, dicía sele pa min: "Esti".
A lo que solía responder mio pá: "Anda, comi y calla".
A vegaes, de nueche, dicían de min: "Esti guah.e ta chifláu; yá volvió a enzarrarse nel cuartu bañu a xugar col agua".
Pero yo nun taba xugando col agua, sinón que, cenciellamente, enllenaba'l llavabu y trazaba col déu'l so nome sobre les ondes de la superficie.

(Fragmentu de "La bicicleta de Sumji", de Amos Oz, perdedor del premiu Nobel de Lliteratura de 2009).

14.8.09

La SGAE zalamea

Depués d'un mes y mediu de vacaciones nuna cueva de cinco estrelles en Monte Cayón -les rapiegues riques somos asina- alcuentro'l mundiu igual que cuando m'apeé. En crisis y casi sin plumes, pero cacarexando.

Préstame, sobre too, la campaña d'imaxe de la SGAE (Sociedá Xeneral d'Autores d'España). Naide como esta entidá y'l so presidente, Teddy Bautista, pa facer amigos. La SGAE pide-y al Conceyu de Zalamea 24.000 euros por representar la obra "L'alcalde de Zalamea", escrita nel añu 1636 por un talu Calderón de la Barca, que tovía nun yé miembru -que se sepa- de la dicha sociedá. La SGAE, la mesma que quier cobrar poles gaites de les romeríes asturianes, polos radiocasetes de les carniceríes y hasta pol soníu rinchón de les terlices, ta faciéndolo de cine. Yé, con diferencia, el colectivu más queríu del país y la so popularidá xorrez por momentos.

Deséo-yos a la SGAE y al Bautista -el mesmu que canciaba aquello de "Si no te ríes de tu propio culo acabarás tomándotelo en serio"- munchu ésitu nesta nueva campaña, que me paez peracertada y mui oportuna.

Enllaces;

Pa saber más de Calderón de la Barca calca equí.
Pa lleer el comunicáu de la SGAE sobre l'asuntu calca equí.
Pa otra visión de la SGAE calca equi.
Pa llibrate de la SGAE calca equí.
Páxina contra el canon de la SGAE equí.
Más coses sobre la SGAE equí y equí.

26.6.09

El pop, de llutu

Y ahora Michael Jakson... A una, raposa rockera, prestaben-y más otros estilos de más puxu, anque hai que reconocer que "Billie Jean" ye una de les meyores canciones de la música pop, y el meyor tema "dance" de tolos tiempos; y que "Thriller" marcó una época y foi el primeru y más ablucante videoclip del sieglu XX. Descanse en paz el "Rey del pop".

Morrió un ánxel

Farrah Fawcett, "la Farrah", apaecía nos sueños más húmedos de munchos adolescentes de los setenta. Yera guapa, mui guapa. Un ánxel. Anque siempre había a quien-y paecía más prestosa Kate Jackson, esa que toos dicíen que yera "la fea", pero que tenía un nun sé qué... Farrah Fawcett, "la Farrah", rubia de frascu, ánxel de Charlie, muñequina guapa, actriz de Hollywood, sex symbol nos tiempos de Maricastaña en pantalones de campana morrió ayeri. Descanse en paz.

8.6.09

Votar y perder

Voté y perdí. Como siempre. Pero lo meyor de too ye que nun m'importa un res.

5.6.09

Acontecimientu planetariu

Esti día nun puedo dexar de comentar que, como tola humanidá, toi que nun vivo, pendiente d'esi acontecimientu planetariu que va camudar la historia del mundu. A un lláu Zapatero, al otru Obama, y allá al so frente Estambul. ¡Ah, non! Eso yé de la "Canción del pirata".

1.6.09

Un puntu de vista

Esti día recibí un corréu electrónicu d'un amigu llaniscu que prefier nun dar el so nome. L'escritu diz asina:


"N'aragonés y en valencianu hai agora más d'una normativa ortográfica pero por motivos jartu serios, como son asemeyase más o menos al catalán. Pero n'Asturias hai hoi una clara escisión ortográfica pola tontada d'escribir fonemas no con lletras sino con puntos y lletras: Mira un foru de internet como el Foro Picos de Europa y verás qu'a lo menos el 99% de los montañeros qu'entran nelli no escriben H.ascal o El H.oón sino Jascal o El Joón.

Covadonga é una vieya que vive n'El Pandellar, un barriu de Turancias; tola vida llamó La Jontalina a un prau de cerca de la so casa, pero agora diz –a lo menos a mí díxomilo asina– La Ontalina porque ponieren un cartel que reza 'La Hontalina' (con un puntu su la hache que no sé reproducir equí). Ocenas de topónimos que la xente lleva diciendo cientos d'años con je puen perdese si escomencipian agora a escribise con esi puntu malditu.

Rapaces del institutu de Cangues, que tú estudiasti nelli, sacan unas jueyas impresas que llaman asina: La Jueya, y no La H.ueya; paez qu'el enjotu de los del puntu ta en que las nuevas xeneraciones escriban con h. pero equí vese bien claru qu'eso no va pasar.

Adolfo García é un de los etnógrafos asturianos más nombraos; caba de sacar un llibru al respetive de las brañas d'Asturias, con otru autor; al entamar la obra aclaran que, pa los topónimos del Poniente, no escriben l.l sino ts porque lo primeru muchas veces no se pue escribir y porque el soníu aseméyase, a lo que más, a una ts.

Las reivindicaciones llingüísticas, si se quier que ganen, tienen que tar cola realidá no en contra d'ella. Y amás tamos en contra de los puntos los montañeros, los de las imprentas, los qu'escribimos n'asturianu del Saliente o del Poniente y, en xeneral, la xente del Mediu, del Saliente y del Poniente d'Asturias".


Pami que'l mio amigu tien razón. La mayoría de la xente del Oriente aceptaría meyor "jueya" que "h.ueya". Tamién sedría munchu más fácil escribir con "j" nos periódicos, porque de la "h." manca nos güeyos de los editores –y de munchos llectores–. Nos carteles de los pueblos, el puntu embaxu la hache nun se ve, colo que muncha xente –polo menos tolos de fuera– pronuncia los topónimos con hache muda. Además, les persones mayores siempre vieron pallabres con "j" y non con una "h." que yé pa ellos ayena, foriata, una imposición. Namás digo que ye un un puntu de vista mui respetable. Y un asuntu lo suficientemente importante como pa debatilu, sin prexuicios, dexando a un lláu los radicalismos y los dogmes de fe.

Un mui bon día

Ayeri foi un mui bon día pal Sporting:
Ayeri foi un mui bon día pal Uviéu:
Ayeri foi un mui bon día pal deporte asturianu.

La semeya del Sporting ye de Alberto Morante / EFE (La Nueva España)
La semeya del Uviéu ye de Jesús Farpón (La Nueva España)

19.5.09

¡Chau Benedetti!

Dicen que morrió d'amor, qu'empezó a apagase cuando finara la so muyer, Luz, va pa tres años. "Acontece la noche y estoy solo / cargo conmigo mismo a duras penas / al buen amor se lo llevó la muerte / y no sé para quién seguir viviendo", dexo escrito nuna de les sos caberes obres. ¡Chau Benedetti!

Táctica y estrategia

Mi táctica es
mirarte
aprender como sos
quererte como sos

mi táctica es
hablarte
y escucharte
construir con palabras
un puente indestructible

mi táctica es
quedarme en tu recuerdo
no sé cómo ni sé
con qué pretexto
pero quedarme en vos

mi táctica es
ser franco
y saber que sos franca
y que no nos vendamos
simulacros
para que entre los dos

no haya telón
ni abismos

mi estrategia es
en cambio
más profunda y más
simple
mi estrategia es
que un día cualquiera
no sé cómo ni sé
con qué pretexto
por fin me necesites
--
(Mario Benedetti)

11.5.09

Susan Boyle

Esta muyer llámase Susan Boyle. Un día decidió presentase a un programa de televisión, "Britain's Got Talent", que ye la versión británica de "Tienes talento". El sueñu d'esta escocesa de 47 años ye ser cantante profesional.
La vida ta enllena de sorpreses.

8.5.09

Día de les Lletres

Esti día tevi n'Uviéu, na manifestación del Día de les Lletres. Tabemos, más o menos, los de siempre: pocos.

25.4.09

Una de pirates

Esti día lleo que'l xuez que condenó á los cuatro responsables del pórticu "The Pirate Bay", tenía intereses personales: pertenecía a dos asociaciones de defensa de los derechos de autor. Delles vegaes cuésta dixebrar los barcos pirates de los de la So Graciosa Maxestá.

23.4.09

Par de dos

Esti día el primer ministru francés, Nicolas Sarkozy, dixo que'l presidente del Gobiernu español, José Luis Rodríguez Zapatero, "puede que nun seya mui intelixente". Paez que los escueyen. Menudu par de dos.

12.4.09

Y Nené Losada

Esti día morrió tamién Nené Losada, esa que se movía na poesía "como cuyarina nunca charca d'augua". La llingua asturiana duelse pola perda.

Corín Tellado

Esti día morrió Corín Tellado. Asturiana de A Caridá, escribió más de 4.000 noveles y vendió más de 400 millones de llibros. Ye l'autora más vendida n'español en tola historia. Namás Cervantes vendió más qu'ella en castellanu, llingua na qu'escribió siempre. Pero dio la cara pola oficialidá del asturianu.

9.4.09

9.000 semeyes

Esti día lleo que'l Conceyu pola Oficialidá axuntó más 9.000 semeyes de persones qu'apoyen la reconocencia del asturianu. Son munches, pero son mui poques.

25.3.09

Spiderman y el neñu autista

Esti día lleo perhí esta noticia, enllena tenrura:


Un bomberu tailandés vistióse de Spiderman pa consiguir qu'un neñu autista d'ocho años abandonara el balcón dende'l que paecía que diba saltar al vacíu.


El sucesu ocurrió nuna escuela especial de Bangkok, onde un maestru vio qu'unu de los alumnos saliera pola ventana'l tercer pisu y nun facía casu a los llamamientos pa salir d'ellí.


La ma del rapacín comentó-y a la Policía que'l críu yera un mui aficionáu a los superhéroes y poco depués apaeció unu de los bomberos disfrazáu del popular Home-Araña, nun desesperáu intentu de salvar al guah.e. "Paecía increyible, pero el pequeñín echóse nos sos brazos en cuantes lu vio", indicó el sarxentu Virat Boonsadao. El bomberu guardaba un disfraz de Spiderman na so taquilla y usábalu habitualmente p'amenizar los ensayos anti-incendios.


Non too ye política na vida, anque a vegaes lo paeza.

19.3.09

El Papa y los preservativos

Esti día armóse la tremolina porque'l Papa Benedito XVI dixo en Camerún que los preservativos namás agranden el problema del sida. Salió entós el secretariu xeneral de Sanidá del Gobiernu español, José Martínez Olmos, y señaló que'l Papa ta "mui mal aconseyáu", polo que-y recomendo entonar el "mea culpa" y rectificar les sos recomendaciones, pa faceles "sobre la base de la evidencia científica". Faime gracia esí afán d'unu y d'otru por indica-y a tol mundu lo que tien que dicir y que pensar.

El Papa puede dicir lo que quiera, y el restu de los mortales tiene dos opciones: face-y casu o pasar d'elli. Supónse que los creyentes siguirán los sos recomendaciones (o non), y que los que nun creyen, o nun creyen lo mesmo que Benedito XVI, les sos pallabres entrarán-yos por un oyíu y saldrán-yos pol otru (o non). El Papa, cuando fala d'estes coses, diríxese a los católicos, que lu reconocen como'l so xefe espiritual y relixosu. Más que nada porque dirixise a los non-católicos sedría una babayada, pues pa ellos nun tien denguna autoridá, nin moral, nin relixosa". Asi que'l Papa fai lo que tien que facer. Fai bien.

El tal Martínez Olmos tiene tamién derechu a dicir lo que quiera, a criticar al Papa y hasta a asegurar que'l preservativu ye'l meyor inventu de la historia. Lo que nun me paez bien ye qu'esixa al Papa que rectifique. Y más que quiera que les manifestaciones de la másima autoridá de la Iglesia católica (apostólica y romana) se basen na "evidencia científica". Ye como si'l Papa-y esixera al secretariu xeneral que basara les sos pallabres na fe y nel temor de Dios.

Martínez Olmos nun fala como dirixente del PSOE, sinón como integrante d'un gobiernu que lo ye de tolos ciudadanos, los creyentes, los non creyentes, los ateos y los agnósticos. Asina que peme que los sos manifestaciones nun son acertaes.

Lo mesmo había que pidi-y a Martínez Olmos que rectificara, pero entós cayeríemos nel mesmu error qu'elli. Asina, que diga lo que-y pete, y que caún-y faiga'l casu que-y apeteza. Como al otru.

A mi nin m'afecta lo que dixo Xuan, nin m'afecta lo que dixo Pepe. Nun necesito, de momentu, guíes; nin espirituales, nin políticos.

3.3.09

Endesa y la lluz


Va pa once años que la empresa llétrica Endesa dexó de tener participación pública. Nun va nin tres años qu'el presidente del Gobiernu español, José Luis Rodríguez Zapatero, prometía "grandes empreses enerxétiques españoles". Endesa acaba de vendese, vuelve a ser pública, pero agora del Gobiernu italianu. Paez que lo que yera malo equí ye bono ellí. Depués de tolo que los españoles invirtieron n'Endesa, los dividendos repártense n'Italia. N'España xube'l recibu de la lluz.


"Siempre hebo tontos y llistos, siempre habrá probes y ricos", dicía la güela raposa.

28.2.09

Oh-la-la!

Esti día lleí daqué percurioso. A los franceses, ociosos ellos, dio-yos un día por pensar qué pasaría si los neños tuvieran derechu al votu. Entós los ciudadanos de "La Republique", como nun teníen otra cosa meyor que facer, encuestaron a cientos de persones, mayores y menores d'edá. Ensiñáron-yos semeyes de políticos franceses desconocíos (mon Dieu!), lo mesmo a los adultos que a los rapazos. A los primeros pidiéron-yos q'elixeran al políticu más competente. A los segundos, qu'escoyeran al meyor capitán de un barcu pa un xuegu por ordenador. Neños y adultos señalaron a les mesmes persones. Ye asina que los galos, tan despiertos ellos, concluyeron que rebaxar la edá de votar de 18 a 5 años nun alteraría'l resultáu de les eleiciones. Sacrebleu!

A saber el gráu de fiabilidá de la encuesta a los enfants (y non tan enfants) de la patrie. Pero si les conclusiones son braeres... lo mesmo votamos sin conocimientu, pola pinta, a voléu, pol envoltoriu. Anque viendo a Zapatero, Rajoy, Llamazares, Areces, Ovidio... peme que non, que votamos a conciencia: pa fadiar el vecín, anque me foda yo tamién de rebote.

La France et moi somos asina, mon ami.

Pa lleer la noticia orixinal calca equí.

19.2.09

Patria (querida)

Na llanisca H.ontoria con hache aspirada de los años cincuenta del sieglu pasáu, el poeta Pablo Ardisana fue testigu d'una conversación ente un vecín del pueblu y un indianu recién llegáu d'América, que ficiera fortuna nel Nuevu Mundu. "Cuando muerra to madre, tú non golverás, ¿eh?", espetó-y el vecín. L'indianu mirólu perseriu a los güeyos y, con voz firme, respondió-y: "Cuando muerra mio madre quedarán las caleyas".


La patria son les caleyes. Y nun hai más patria (querida).

16.2.09

Chávez y les fabes

Cuando yo yera una rapieguina chiquituca tenía un primu, un raposu gris americanu, que vivía en Venezuela. Venía nos años pares a Asturies, de branéu. Un día tábemos viendo la tele (N'España había daquella dos canales, el VHF y el UHF, pero nel mio pueblu namás se vía el primeru) y pregunté-y cuantes cadenes de televisión había en Venezuela y respondiome que, polo baxo, habría cuarenta o cincuenta. Cuntaba ocho o diez cadenes nacionales y munches más rexonales y locales. Yo quedé almirada de lo modernu que yera aquel país. Un país onde el llitru de gasolina costaba tres o cuatro pesetes. ¡Menos que l'agua mineral! Un país que producía petroleu abondo y que, cola so moneda, el bolivar, a cinco pesetes, teníalo too pa facese grande y poderosu.


Llámenme l'atención los que s'estrañen de que un personaxe como Chávez gobierne Venezuela. Tolos gobernantes anteriores foron nefastos: con aquella potencialidá ente les manes foron incapaces de construyir una clase media potente, un estau del bienestar, una nación decente. Tolo contrario: aprobecieron el país y dexaron a la mitá de los ciudadanos na probeza. Asína nun ye estraño que illuminaos y salvapatries lleguen al poder al través de les urnes.


En cuantu al referendu de güei... Chavez quier fincase nel poder hasta morrer de vieyu o hasta llevar a los venezolanos a l'aburrición. Nada nuevu: n'España el PSOE quier facer lo mesmo y naide s'estraña.


Quiero dicir con esto que Chávez tien esplicación.


Que a Chávez, anque seya un peligru públicu, un demagogu, un chifau y un charrán, elixéronlu democráticamente. Y democráticamente debe ser vencíu. Sin atayos.


Y quiero dicir tamién qu'en toles cases cuecen fabes y na mía a calderaes.

12.2.09

Dios y les probabilidaes


Esti díá tenía yá ganes de referime a la polémica de los autobuses con mensaxes ateos, esos del anunciu que diz: "Probablemente Dios nun esiste. Dexa de preocupate y disfruta la vida".


Tan llocos estos ateos, que diría Obelix. Agora que teníen a casi tol mundu comencíu de que la relixón yera cosa privada y que había qu'apartala del ámbitu públicu, van y llancen una campaña que val xusto pa lo contrario: pa sacar a la relixón del armariu y devolvela a la cai.


Digo yo que tol mundu tendrá derechu a dicir lo que-y pete: los ateos col so rollu y los creyentes col de so. A mí, rapiega adulta, danme de lláu les chancletaes d'estos y d'aquellos. Lo que nun sé ye l'efeutu que tendran esos mensaxes (los d'un sen y los del otru) en persones a medio formar, neños o adolescentes. Preocúpame.


Por otru llau, si dicen que "probablemente" nun esiste, ye qu'almiten la posibilidá de que sí esista, lo que ye percurioso tratandose d'ateos. La pregunta sedría qué probabilidá calculen ellos qu'hai de que Dios nun esista. ¿El noventa por cientu? ¿El noventa y nueve y mediu? Dígolo más que nada porque la probabilidá de que a ún-y toque el "Gordu" de Navidá ye d'un 0,0012 por cientu. Pero toca el cien por cientu de les veces. A otros, claro.


El casu ye qu'esti asuntu ta xenerando polémica y, tamién, ta dexando ver el munchu inxeniu y la muncha sorna del pueblu llano. Nun artículu espublizáu'l pasáu martes nel "ABC", el columnista Antonio Burgos incluyó frases que-y mandaran los llectores. Hai una que voi poner equí por inxeniosa y por asturiana:


"Probablemente los llagostinos nun esisten. Dexa de preocupate y disfruta de la to lata de fabada".


P'acabar, una preguntina inocente: ¿Cuántes probabilidaes hai de qu'esos valientes ateos inxerten un anunciu d'estos, referíu a Alá, nun país árabe? Peme que la solución tiende a cero.


Ye mui probable que l'ateismu nun seya más qu'otra relixón.

6.2.09

Valentía

Esti día vi a Jordi Dauder recoyer el premiu "Goya" al meyor actor de repartu pol so papel en "Camino", película dirixida por Javier Fesser. L'actor catalán, na so intervención, alabó la "valentía" de Fesser por facer esa película. Nun la viera, pero sé polos papeles que, ente otres coses, critícase con fuercia al Opus Dei y, por estensión, a la Ilesia. Al marxe de cualaquiera creyencia política o relixosa, pocos ñegarán qu'agora mesmo lo políticamente correuto pal pensamientu únicu dominante ye criticar a los cures, a la xerarquía católica y al dios de los cristianos. Ye por eso que valiente, valiente, nos tiempos que cuerren, peme que sedría tolo contrario: alabar na película al Opus Dei, a los obispos o a la Ilesia de Roma. Seguramente nun alcontraría el que ficiera esto último productor, nin actores dispuestos a participar na película. Y los que lo fixeren quedaríen dexuru marcaos pa tola vida. Porque nel mundiu del cine español, güei, solo val ser progre. ¡Qué digo progre!, ¡Hipermegaprogre!. ¿O vais dicime que non?

Too esto dígolo por provocar. Y como la verdá ye más provocadora que la mentira...

30.1.09

La crisis que nos afuega

La crisis que nos afuega nun ye más que falta de confianza, falta de fe. Los bancos nun se fíen de los clientes. Los clientes nun se fíen de los bancos. Los ciudadanos nun se fíen del Gobiernu. El Gobiernu nun se fía de los ciudadanos. Les empreses nun se fíen del futuru. El futuru nun ye fiable...

El capitalismu, lo mesmo que'l socialismu, nun dexa de ser otra relixón. Enllena de dogmes. Cuando falta la fe lleguen les duldes. Y con elles... la crisis que nos afuega.

29.1.09

Indecencia

Esti día hai 13.896 millones de razones pa esi titular.

Ye'l beneficiu netu que sumaron, l'añu pasáu, el Bancu Santander (8.876 millones d'euros, 1,47 billones de pesetes) y el BBVA (5.020 millones d'euros, 835.257 millones de pesetes). Pa marease.

Y el Gobiernu ofreciéndo-yos perres (les de tolos ciudadanos, les nuestres) pa que la crisis nun los afecte.

Y enfrente millones de paraos, empreses zarraes, hipoteques, necesidá...

Ellos dirán "demagoxa". Yo digo "indecencia".

23.1.09

Cuatro gatos

...Y lo mesmo tamos equí cuatro gatos mal cuntaos, mirándonos pal embeligu, dando vueltes y revueltes a una llingua que igual, sin enteranos, dexó d'esistir va sieglos.


Y lo mesmo escribimos pa naide, porque solo nos lleemos nosotros mesmos. Los unos a los otros. Tú a mí, yo a tí...


Y lo mesmo nun val pa nada tolo que facemos, convencíos de que ye xusto y necesario, por un idioma que namás falamos nosotros, tú, yo, esti y aquelli...


Cuatro gatos mal cuntaos.

21.1.09

Les cuentes d'Obama

Esti día oyimos el primer discursu d'Obama como presidente de los Estaos Xuníos. Naide dulde de que taba perpensáu. De la primer a la cabera pallabra. Pero, ¿qué pallabres fueron les más repetíes y cuales pronunció poco, o nun pronunció? Estes son les cuentes d'Obama.

13 vegaes:
Nuevu (-a, -es, -os).

12 vegaes:
Nación (-es).

10 vegaes:
Trabayu (-ar), facer.

9 vegaes:
Nosotros.

8 vegaes:
País (-es), xeneración (-es), güei.

7 vegaes:
Estaos Xuníos.

6 vegaes:
Pueblu (-os), muyeres, mundu, grande (-s, -ura).

5 vegaes:
Dios, llibertá, alantre, gobiernu (-os).

4 vegaes:
Estauxuniense (-s), crisis, confianza, esperanza, vida, poder (-osu), riqueza, camín, bien (-es), mal (-es), peligru, tierra.

3 vegaes:
América, paz, economía, prosperidá, home (-s), amigu (-os), promesa (-s), serviciu (-os), idea (-les), vieyu, humilde (-á), xuramentu, esfuerzu (-os), responsable (-ilidá), construyir, seguridá, gracies.

2 vegaes:
Ciudadanos, musulmán (-es), guerra, neños, enemigu (-os), camudar, sanidá, intereses, emplegu (-os), xenerosidá, cooperación, antepasaos, protexer, odiu, fuercia, ambiciones, oportunidá (-es), patriota (-ismu), planeta, amenaza, sangre, digna (-idá), virtú, humanu (-a), política, futuru (-a).

1 vegada:
Comunismu, felicidá, xusticia, ciencia, raza, probe, cultures.

0 vegaes:
Europa, igualdá, recuperación.