13.9.08

Nun se vos puede dexar solos

Esti día dígovos que vase una de vacaciones un par de mesinos (les riques y les rapiegues somos asina) y cuando vuelve alcuentra'l mundu pates p'arriba. A mediaos de xunu l'asuntu pitaba. Ye verdá que s'oyíen dalgunes voces –les pesimistes de siempre- que falaben de crisis económica y de pinchazu inmobiliariu. Pero naide-yos facía casu. ¿Pa qué? Solbes, socialista presuntu, daba clases maxistrales de capitalismu lliberal con esi tonu de so que paez dicir que toos -menos elli, claro- somos imbéciles. Y Zapatero remendón, a sus zapatos. Pero marchó una, y tóu se fue al garete (que debe ser un sitiu enllenu coses, porque, col tiempu, casí tóu acaba diéndose p'allá). Hai quien fala yá de recesión. Tremendu, mete miéu. Voi ver si puedo enderechar l'asuntu. Pero dígovos daqué: nun se vos puede dexar solos.

1 comentario:

Lluis de Turiellos dijo...

Nomenón. Nun se vos pue dexar ser rebañu, que güe solu bien se llambe, como diz el refrán.
(Allégrome qu'andes perende y que nun cayeres nel llazu de nengún furtivu. Un saludín.)