"La yenka"

Esti día Zapatero y Rajoy baillaron "La yenka". Tola nueche anduvieron colo de "izquierda, izquierda; derecha, derecha; delante, detrás; un, dos, tres". Esto ye, munchu movimientu aparente, pero, a la fin, too quedaba en mesmu sitiu. Nuna braera burlla a los ciudadanos, ensiñaron dambos milenta gráficos, surdíos de torpes manipulaciones matemátiques que nun engañaben nin a un neñu teta. Ye lo qu'hai. Y, polo que se ve, ye lo que gusta. Porque l'ochenta por cientu de los votantes, o más, darán-yos respaldu a estos dos individuos nes elecciones del prósimu 9 de marzu. Hai que da-yos tamién lo suyu a los medios de comunicación, que, casi sin escepción, proclamaron ganador al so candidatu, por puru interés políticu, sin dengún tipu d'analisis periodísticu imparcial y responsable. Lo que demuestra que les encuestes d'encargu son, polo xeneral, mentires mercenaries, y que la mayoría de los medios de comunicación nun pretenden informar, formar y entretener, sinón manipular, adoctrinar y distrayer.

Queda un segundu debate, el prósimu llunes. Depués de que Zapatero y Rajoy charraran ayeri ca ún de lo que-y petó, sin casi escuchar al otru; depués de que nun ficieran más qu'insultase y mirar p'atrás, sedría conveniente que'l llunes punxeran la vista al frente y se dedicaran a dar soluciones y propuestes de futuru pa resolver los problemes de los alministraos. Que son los que-yos paguen los sos sueldos (non chicos, por ciertu). Taría bien (sedría normal) que los dos únicos candidatos con posibilidaes reales d'algamar la presidencia del Gobiernu d'España ficieran daqué más que baillar otra vez "La yenka", una canción que tuvo bien va 42 años, pero que yá fiede.