Esti díá tenía yá ganes de referime a la polémica de los autobuses con mensaxes ateos, esos del anunciu que diz: "Probablemente Dios nun esiste. Dexa de preocupate y disfruta la vida".
Tan llocos estos ateos, que diría Obelix. Agora que teníen a casi tol mundu comencíu de que la relixón yera cosa privada y que había qu'apartala del ámbitu públicu, van y llancen una campaña que val xusto pa lo contrario: pa sacar a la relixón del armariu y devolvela a la cai.
Digo yo que tol mundu tendrá derechu a dicir lo que-y pete: los ateos col so rollu y los creyentes col de so. A mí, rapiega adulta, danme de lláu les chancletaes d'estos y d'aquellos. Lo que nun sé ye l'efeutu que tendran esos mensaxes (los d'un sen y los del otru) en persones a medio formar, neños o adolescentes. Preocúpame.
Por otru llau, si dicen que "probablemente" nun esiste, ye qu'almiten la posibilidá de que sí esista, lo que ye percurioso tratandose d'ateos. La pregunta sedría qué probabilidá calculen ellos qu'hai de que Dios nun esista. ¿El noventa por cientu? ¿El noventa y nueve y mediu? Dígolo más que nada porque la probabilidá de que a ún-y toque el "Gordu" de Navidá ye d'un 0,0012 por cientu. Pero toca el cien por cientu de les veces. A otros, claro.
El casu ye qu'esti asuntu ta xenerando polémica y, tamién, ta dexando ver el munchu inxeniu y la muncha sorna del pueblu llano. Nun artículu espublizáu'l pasáu martes nel "ABC", el columnista Antonio Burgos incluyó frases que-y mandaran los llectores. Hai una que voi poner equí por inxeniosa y por asturiana:
"Probablemente los llagostinos nun esisten. Dexa de preocupate y disfruta de la to lata de fabada".
P'acabar, una preguntina inocente: ¿Cuántes probabilidaes hai de qu'esos valientes ateos inxerten un anunciu d'estos, referíu a Alá, nun país árabe? Peme que la solución tiende a cero.
Ye mui probable que l'ateismu nun seya más qu'otra relixón.
6 comentarios:
Un apunte: en Gran Bretaña hubo que poner el "probablemente" por imperativu llegal, porque sedría illegal poner "Dios nun esiste": tamién ehí ha lleis contra la blasfemia. ¡Mira tu, colo lliberales que paecíen!
Mui interesante, nun lo sabía. Estos anglosaxones son un poco boborolos.
Lo peligroso ye que baxo esti puntu de vista (y el de la entrada anterior) tamién puede ser considerao como progre ...... la defensa de la Llingua,la crítica a los políticos, la crítica a los bancos y los beneficios. Quien ye'l valiente que diz que los bancos son buenos, Areces nun lu fai del todo mal, l'asturiano ye un dialeutu, ......
saludos y norabona pol blogue
Eso de que los bancos son buenos, que Areces nun lo fai mal del too y que l'asturianu ye un dialectu... ¡dizlo la mayoría! ¿Nun ves que la mayoría tien negocios con aquellos, vota a esi y pasa de la llingua? Por supuestu que tienes razón no de que puede considerase progre (o conservador) cualaquier pensamientu. A mi lo de progre dame igual, yo ya dixe que namás creyo na anarquía aburguesada. Pero nos tiempos que cuerren lo fácil ye apuntase al pensamientu únicu de la presunta izquierda, esa que se manifiesta al través de Wyoming, Garzón... Y lo difícil ye votar al PP (o reconocelo), comulgar colos obispos...
Lo cual nun quier dicir que nun merezcan tar nel mesmu sacu los obispos, Garzón, Wyoming, Areces, los bancos y la madre que los añó a toos. (Cola llingua ya nun m'atrevo).
Y mnches gracies por lleer y por comentar.
por cierto ... onde tan los Ludovico settembrini ( ficticiu ) o los Bertrand russells ( real ) del ayer !
L'ateismu ta n'hores baxes si tolo que produz son los llibros del dawkins y la campanha del autobus ... Humbugs ,,,, !
Publicar un comentario