Feliz Navidá

Esti día deséovos que l'amor enllene les vuestres vides, porque como dixo'l poeta Pablo Ardisana, "tou lo que non é amor, é mercancía".

Bones fiestes, feliz Navidá.

Tontu los coyones

Esti día l'alcalde de Xetafe y presidente de la Federación Española de Conceyos y Provincies, el socialista Pedro Castro, estrañábase de que hubiere tovía tantos "tontos de los coyones" que voten a la derecha. Esti puntu yé'l mesmu que borró la cara de la presidenta de la Comunidá de Madrid, Esperanza Aguirre, d'un anunciu municipal. Lo qu'estraña yé que un tontu los coyones seya alcalde de talo y presidente de cualo.

Landa, sin complexos

Esti día, Alfredo Landa, actor grandísimu, dixo nuna entrevista nel diariu "El País" dos coses: una, que yé un home de dereches, y dos, que se puede ser de dereches sin ser "facha". Yo diría tovía más: tamién se puede ser de izquierdes y "facha", porque el fascismu nun ye una ideoloxía política sinón una actitú personal. Los "fachas" son como los "pijos": hailos de tolos colores políticos.

Alfredo Landa yé un home sin complexos. Y a mi gústenme les persones sin complexos, seyan de dereches, de centru o de izquierdes. Dichu sea de pasu, la so interpretación del bandidu Fendetestas na película "El bosque animado" yé grandiosa.

As time goes by

Esti día, col cuentu de les elecciones americanes quedóse nel tinteru un comentariu sobre unes pallabres del presidente executivu de la SGAE (Sociedá Xeneral d'Autores d'España), Eduardo (Teddy) Bautista, quien dixo: "El canon ye agua pasada. Eso págase y yá ta, y al que nun-y guste que s'aguante".

Como esti tipu de comentarios yá califiquen al que los pronuncia, namai diré tres cosines:

1. Teddy Bautista ye'l mesmu que, a la par que refugaba la corbata, interpretaba un cantar tituláu "Si nun te riyes del to propiu culu acabarás tomándotelo en seriu".
2. Teddy Bautista fue Xudes na versión española de "Xesucristo Superstar".
3. Ente da-y de comer a Xudes o a un inmigrante subsaharianu, téngolo pernidio.

As time goes by.

Fala Obama

Esti día, les primeres frases de Barack Obama tres de la so victoria eleutoral:

• "Esta victoria en sí mesma nun ye'l cambéu que buscamos. Ye solo la oportunidá pa que fagamos esi cambéu".
  
• "Si esta crisis financiera nos enseñó daqué, ye que nun puede haber un Wall Street (sector financieru) prósperu demientres que Main Street (sector comercial) sufre". 
  
• "Nesti país, avanzamos o fracasamos como una sola nación, como un solu pueblu. Resistamos la tentación de recayer nel partidismu, la mezquindá y la inmadurez qu'intosicaron la nuesa vida política dende va munchu tiempu".
  
• "Estos son los nuesos tiempos, pa dar emplegu al nuesu pueblu y abrir les puertes de la oportunidá pa los nuesos neños; pa restaurar la prosperidá y fomentar la causa de la paz; pa recuperar el sueñu americanu y reafirmar esa verdá fundamental, que, de munchos, somos unu; que demientres respiremos tenemos esperanza. Y onde nos alcontremos con escepticismu y duldes y con aquellos que nos dicen que nun podemos, contestaremos con esi créu etenru que resume l'espíritu d'un pueblu: Sí podemos".
  

Obama, blancu y negru

Esti día la esperanza fízose realidá: ganó Obama.

De xuru que la izquierda europea arimará l'áscuara a la so sardina. Nun facer casu: ye perdifícil entender la política de los Estaos Xuníos sin pega-y un esmenón a la mentalidá europea. Nin los demócratas son el Frente Popular, nin los republicanos la CEDA, nin too lo contrario. La radicalidá llibertarista y individualista de los norteamericanos fai que los partíos seyan ellí bien diferentes a los del Vieyu Continente. Y tamién que los cargos públicos rindan cuentes ante los votantes, y non ante los aparatos de los partíos, como pasa nesta España partitocrática de llistes pesllaes. Nos Estaos Xuníos nun esiste nin la disciplina de partíu, nin el transfuguismu, que ye un falsu demónganu inventáu polos aparatos de los partíos, esos que ponen y quiten, premien y castiguen.

Dos cosines más: Primera, que Obama ye tan blancu como negru, ricu y mui pijo. Y segunda, que recaudó más de 600 millones de dólares pa la so campaña electoral, casi el duble que Bush va cuatro años. Esa barbaridá de dineru nun salió del bolsín de los probes: detrás d'Obama, lo mesmo que de McCain, hai grandes grupos empresariales, multinacionales, bancos, medios de comunicación... intereses. Lo que pasa ye qu'hai tovía quien nun cayó –o nun quier cayer– del ñeru.

Esperanza

Esti día la esperanza llámase Barack Obama.

Un chiste malísimu

Esti día lleo varies noticies nos papeles que, axuntaes, paecen un chiste.

Por un lláu, Unión Fenosa tuvo un beneficiu netu de 899 millones d'euros nos primeros nueve meses d'esti añu, lo que supón un 27,6 por cientu más que nel mesmu períodu de 2007.

Por otru, les llétriques calculen que'l preciu de la lluz tien que xubir ente un 20 y un 25 por cientu. El presidente de la patronal llétrica, Pedro Rivero, dixo que la xubida del 11,3 por cientu propuesta pola Comisión Nacional de la Enerxía (CNE) sirvirá namás p'atapar "l'incrementu adicional del déficit tarifariu" y pa frenar qu'esti "desaxuste" nun vaya a más, pero non pa reflexar los costes de mercáu.

Finalmente, Unesa calcula que p'acabar colos cerca de 14.550 millones d'euros de déficit de tarifa acumuláu, cada consumidor debería pagar una media de 577 euros, y alvirtió de que cuantu más s'axuste agora la tarifa menor sedrá l'endeudamientu futuru de los clientes.

Conclusión: pa ellos nunca hai crisis. Ellos ganen  más que nunca. Y amás quieren que seyan los consumidores, los clientes los que paguen los supuestos "déficits tarifarios", los presuntos  "desaxustes" y hasta los "incrementos adicionales" de bla, bla, bla. Eso sí a ellos nun-yos pidas que dexen de viaxar en primera.

Too esto ye un chiste. Pero un chiste malu, malísimu. Un chiste que nun tiene gracia nenguna. Anque ellos nun paren de rise, los mui...

Al Gore y los regodones

Esti día'l profeta Al Gore y el visionariu Juan José Ibarretxe ficieron negocios en Bilbao. El segundu pago-y al primeru 200.000 euros pa que posara con elli nuna semeya y, de pasu, pa que pronunciara la charra "Pensando en verde; una estratexa económica pal sieglu XXI" delantre d'un cientu empresarios.

Nin creyo nin volveré a creyer en Al Gore o en Juan José Ibarretxe, porque dambos paécenme cuentistes y cuenteros. Nun creyo nel presuntu ecoloxista que viaxa nun avión priváu y que paga 24.600 euros al añu de lletricidá. Y tampoco nun creyo nel supuestu demócrata que nun acepta les regles del Estáu de derechu. Porque entós aquelli nun ye ecoloxista y esti nun ye demócrata. Nun ye de recibu tirase'l rollu y dempués facer tolo contrario a lo que se predica. A los ecoloxistas y a los demócratas, lo mesmo que a los profetes y a los visionarios, hai qu'esixi-yos que prediquen col exemplu.

De toles maneres, nun ta mal 200.000 euros por una semeya y una charra. Yo por esi dineru posaba tamién y pronunciába-yos un discursu, que se yo, sobre los charranes y los regodones, por exemplu.

(La semeya ye de Bernardo Corral)

Deseos

Esti día toquen deseos d'una nueche de seronda:

• Quiero ser bancu, pa que papá Estáu me ponga inyeiciones gratis cuando me entre cagalera pola crisis económica.

• Quiero ser "La Sexta" pa llama-y "payasu" a tol que me caiga mal y dempués xustificalo col cuentu de que foi "un error técnicu".

• Quiero ser política pa facer el paripé y conxelar el mio sueldu esti añu, y pal prósimu subilu, un suponer, el venti por cientu.

• Quiero ser Miguel Angel Revilla pa chinchar a Vicente Álvarez Areces (que se yo que'l más gordu nun puede ver al más flacu).

• Quiero ser androide pa suañar con oveyes llétriques.

Crisis

Esti día pienso que'l capitalismu ye esi sistema económicu que permite que los ricos ganen dineru enforma cuando hai bonanza, y que ganen tanto o más cuando hai crisis. Ta too mui bien pensao. Bon exemplu de l'asuntu ye'l preciu l'esquistu. Cuando'l preciu'l barril xube, por exemplu, un venti por cientu, el preciu la gasolina xube, polo baxo, un ventitantos por cientu. Lo bono llega cuando el preciu'l barril baxa, por exemplu, un venti por cientu; entós el preciu la gasolina baxa -cuando baxa- un cinco por cientu (o un poqueñín menos). Esto ye, que les petroleres, heba espoxigue económicu o heba crisis, siempre acaben ganando más qu'enantes. Por eso de mayor quiero ser rapiega petrolera, accionista mayoritaria de Repsol, Exxon Mobil, BP, Petrochina o Shell. Dame igual una que otra. Y dempués, crisis a min.

Paul de los güeyos azules

Esti día namás puedo dicir que yera guapu, guapu. Los güeyos más azules de Hollywood zarráronse pa siempre'l vienres pasáu. Paul Newman yé, por derechu propiu, un de los grandes del cine, un mitu.

Cites de les sos películes:
• "Actúa como si tovieres fe y la fe nacerá en ti" (Veredictu final).
• "Esta yé la vida qu'escoyimos. Y una cosa ta nidia, nengún vedremos el cielu" (Camín a la Perdición).
• "Si me pagara lo que gasta pa evitar que lu roben, yo non lu robaría" (Dos homes y un destín).
• "Un dólar ganáu nel xuegu ye'l doble de dulce qu'un dólar ganáu nel to sueldu" (El color del dineru).

Nun se vos puede dexar solos

Esti día dígovos que vase una de vacaciones un par de mesinos (les riques y les rapiegues somos asina) y cuando vuelve alcuentra'l mundu pates p'arriba. A mediaos de xunu l'asuntu pitaba. Ye verdá que s'oyíen dalgunes voces –les pesimistes de siempre- que falaben de crisis económica y de pinchazu inmobiliariu. Pero naide-yos facía casu. ¿Pa qué? Solbes, socialista presuntu, daba clases maxistrales de capitalismu lliberal con esi tonu de so que paez dicir que toos -menos elli, claro- somos imbéciles. Y Zapatero remendón, a sus zapatos. Pero marchó una, y tóu se fue al garete (que debe ser un sitiu enllenu coses, porque, col tiempu, casí tóu acaba diéndose p'allá). Hai quien fala yá de recesión. Tremendu, mete miéu. Voi ver si puedo enderechar l'asuntu. Pero dígovos daqué: nun se vos puede dexar solos.

Xente de tambor y gaita

1. Esti día los socialistes catalanes aproclamen que Cataluña ye "una nación con territoriu, llingua y cultura propios".

2. Esti día los socialistes asturianos aproclamen que Asturies igual ye un sitiu, anque nun ye seguro.

3. Definiciones:

esquizofrenia, la: sust. Enfermedá mental [que produz trestornos na personalidá].

traicionar: v. Ser deslleal, infiel [con daqué o daquién]. 2 Producir [un mal que nun s’esperaba].

cinismu, el: sust. Postura filosófica [basada na defensa del estáu natural, na crítica a les convenciones sociales y na autosuficiencia del individuu]. 2 Comportamientu [propiu d’una persona falsa, mentirosa que nun tien cargu de conciencia].

deceición, la: sust. Efeutu negativu [que causa nel ánimu’l dase cuenta de qu’una cosa o una persona nun respuende a lo que s’esperaba d’ella]. 2 Cosa o persona [que causa un efeutu negativu nel ánimu por nun responder a lo que s’esperaba d’ella].

xente de tambor y gaita: dichu. Grupu de persones [que nun tienen formalidá, chapeta, sentíu común o capacidá normal pa xulgar y actuar con aciertu].

Igual ye una bicicleta

Esti día un tal Aréstegui, diputáu del PP pola gracia (nunca meyor dicho) de Ovidio Sánchez, diz que l'asturianu nun puede ser oficial porque nun ye un instrumentu de comunicación. Igual ye una bicicleta. Y lo mesmo el tal Aréstegui ye'l más preclaru intelectual que vio la Xunta Xeneral. La tiranía de la mayoría ye un fecho indiscutible n'Asturies. De pena.

Gano'l talentu

Esti día España, campeona d'Europa. Esta vegada sí: gano'l talentu. Y Asturies tuvo ellí.

De Primera

Esti día ye de Primera.

Los políticos europeos y el banduyu

Esti día políticos de tolos requexos d'Europa -socialistones, conservadorones y lliberalones- minimicen el "non" de los ciudadanos d'Irlanda al Tratáu de Llisboa y dicen que esa Xunión Europea que quieren metenos a torniellu siguirá p'alantre. Los mandatarios irlandeses van tovía más allá y analicen la posiblidá de convocar otru refrendu. Y el presidente pertugués, Cavaco Silva, dexó bien nidiu el so sintir democráticu al dicir que nun hai que someter nunca los trataos a refrendu, porque son "demasiao importantes".

Peme que los políticos europeos debíen dicinos a los ciudadanos d'una puñetera vegada que-yos da igual lo que votemos, que-yos da lo mesmo lo que sala nos refrendos, que-yos da de lláu si nos presta o nun nos presta esa Europa que ufierten. Dígolo porque si fueren claros y nos lo dixeren de mano, perderíemos menos tiempu, dexaríemos de votar y aprovecharíemos los díes d'ellecciones pa, por exemplu, rascanos el banduyu, que ye, por ciertu, lo que faen la mayor parte del tiempu los políticos europeos.

Si lo diz el tíu Sam...

Esti dibuxu tomóse emprestáu de González y González.

Yo doi la cara pola oficialidá

Esti día, campaña del Conceyu Abiertu pola Oficialidá: 

"Yo doi la cara pola oficialidá".

Apúntome.

Inentendible

Esti día lleo lo siguiente: Escontra "la consulta vinculante" del lehendakari, Juan José Ibarretxe, Patxi López reivindica un referéndum "con toles consecuencies".

Lleílo, relleílo, y al final dime cuenta de que si nun entendía nada yera... porque nun falo vascu.

Ya lo dicía mio güela: p'andar pel mundiu hai que saber idiomes.

Teletini al ataque

Esti día la Televisión del Principáu d'Asturies (TPA), más conocía nel país col llamatu de Teletini, va estrenar "Un día con...", programa nel que la periodista Nieves Herrero dialoga y interactúa con 14 personalidaes de diferentes ámbitos de la sociedá española. La primer protagonista va ser Concha Velasco. Depués llegarán episodios colos actores Soledad Mallol y Arturo Fernández; los cantantes Manolo Escobar, Lolita Soraya y Falete; el peluqueru Lluis Llongueras; la modelu Laura Ponte, el ex deportista Fernando Romay y el ex toreru Ortega Cano, ente otros.

Como bien se ve, ye un programa pernecesariu p'Asturies, qu'aportará muncho al país y que afondará na cultura llariega. Yera un clamor popular que Nieves Herrero desembarcare en Teletini, pa ensiñanos a facer periodismu d'altura. Y too ello dende esa perspectiva asturiana que siempre-y da la Herrero. Tamién s'echaba en falta na TPA a personaxes tan fondamente asturianos y que tanto pueden aportar a esta nación pequeñina como Manolo Escobar, Falete, Lluis Llongueras o Ortega Cano. Podemos los asturianos tar contentos colos responsables de la programación de Teletini, que nos ufiertan programes d'un valor inestimable. Esti ye'l camín. Asina se fai país, asina se fomenta la cultura. Gracies, gracies.

Xusticia

Esti día camiento que nun sé lo que dirá'l Códigu Penal austriacu, pero si'l monstruu que mantuvo enterrada en vida a la so fía demientres 24 años, la violó dende que tenía 11 años y fizo-y siete fíos, si esi ser inhumanu fora español posiblemente nun entraría na cárcel. Porque n'España la edá penal másima tá establecía en 70 años. Pedro Pacheco, andalucista ex alcalde de Xerez, tevo percerca de dir a la cárcel por dicir que la xusticia n'España yera "un cachondeo". La xusticia, nun sé, pero'l Códigu Penal, paezlo.

Infiernu

L'infiernu afayábase nun suétanu d'Austria. Delles vegaes l'horror escuéndese baxo xardines floríos.

L'Estatutu y los calcetos

Esti día, el PSOE –del PP val más nun falar– criticó a IU porque la coalición quier un nuevu Estatutu, a caballu ente los de Castiella-La Mancha, Andalucía y Cataluña. L'agrín y repunantucu diputáu socialista Fernando Lastra, inquisidor mayor del reinu, cargó escontra IU por querer "camudalo too, mirando al modelu catalán, col argumentu de que representa la másima autonomía". Unes preguntines perfáciles: ¿Ye malo mirar al modelu catalán, que tanto defendiera'l PSOE, o ye que tenía razón el PP al criticalu? ¿Lo que ye bono pa Cataluña ye malo p'Asturies? ¿La másima autonomía ye bona pa Cataluña y mala p'Asturies? ¿Sedrá qu'hay que falar catalán na intimidá pa merecer unos calcetos nuevos envede conformase col remiendu de los que ya tan trildos?

Lastra, más alantre, sorrayó que la reforma que PSOE y PP defenden pal Estatutu d'Asturies, al contrariu que lo que propón IU, "s'enmarca nun proyeutu común, que ye España, y trata de modernizar y de impulsar l'Estáu de les autonomíes". Entos, ¿ye que l'Estatutu catalán nun s'enmarca nesi proyeutu común que llamen España? ¿Ye que nun busca modernizar y impulsar l'Estáu de les autonomíes l'Estatutu catalán? Taría bien qu'estos socialistes esplicaran por qué defendieron tanto l'Estatutu de Cataluña si agora ye tan malu. ¿O sedrá qu'Asturies ye menos país que Cataluña? ¿O sedrá qu'Asturies nun ye nacionalidá histórica? ¿O sedrá qu'Asturies nun ye nacionalidá? ¿O sedrá qu'Asturies nun ye?

Infiernu

Esti día entamé a ver na televisión un reportax de les barbaridaes nazis. Dexóme mui mal. Dalgunes vegaes paez que la crueldá humana nun tien llendes. Aguanté lo que pudi. Hasta que vi como nun campu concentración, un nazi separtaba unos metros a un críu d'unos tres o cuatro años de la so madre. La voz en off dixo qu'entonces "pegó-y un tiru"... Nun sé si l'asesín rabiosu mato al neñu o a la ma, porque nun fui quien a siguir mirando. Apagué la tele y zarré los güeyos.

Tovía teo na cabeza los muertos, les tortures y a esi chiquitín inocente y a esa madre, desesperaos, impotentes y vencíos, atrapaos nel infiernu.

El pastel eleutoral

Esti día nun hai nada nuevu. PSOE y PP repartiéronse tóu'l pastel, como siempre. Conocíemos el nome de los ocho diputaos asturianos anantes de les votaciones, lo que demuestra qu'esta ye una democracia dirixía, una democracia pa menores d'edá, una partitocracia na que son los aparatos de los partíos los que ponen, quiten y deciden. D'ehí que los diputaos y demás cargos públicos rindan cuentes ante l'aparatu del partíu, y non ante los ciudadanos. Queda tamién demostrao lo que ye güei'l movimientu asturianista: 2.102 votos. Los que sumaron Andecha Astur y Unidá. Nada. Cero. Deprimente.

El bipartidismu impúsose n'Asturies, como en cuasi toos los requexos del Estáu. Eso significa, por dolorosu que seya, que la cabera esperanza p'algamar la oficialidá del asturianu pasa o pol PSOE o pol PP. Y nesti momentu vese munchu más cerca de la oficialidá al PP. El PSOE nunca enxamás apoyará la oficialidá con Vicente Álvarez Areces na presidencia. Los socialistes, estos socialistes tan a otres coses, pa ellos más importantes, mientres que'l PP anda dando palos de ciegu, a la gueta de so. Ye lo qu'hai. Esti país ye lo que ye. Y polo que se ve nun quier ser otra cosa. Asumilo ye'l primer pasu p'alcontrar el camín que conduza a la oficialidá; o lo que ye lo mesmo, a la dignidá.

Resultaos de les eleiciones xenerales n'Asturies equí.

Voté

A la final voté, anque sin muncho aquello.

Inhumano

Matar ye inhumano.

Falta de chapeta

Esti día la Xeneralidá de Cataluña editó un cartel del Día de la Muyer en 25 idiomes, ente los que tan el catalán, el serbucroata, l'urdú, el bengalí, el rusu, l'esperantu, el vascu, el xaponés... Pero nun apaez el castellanu. Al marxe d'ideoloxíes, esto ye una fatada xigantesca. El catalán nun gana un res con esta falta de chapeta. Sobren faltosaes.

La cuestión

Esti día digo: Votar o nun votar, esa ye la cuestión.

Papelón vergoñosu

Esti día peme vergoñosu'l papelón de la mayoría de los periodistes nos debates televisivos tres el debate Zapatero-Rajoy. Ye triste ver como llamben ca ún al so amu. Ye indecente ver como faen el trabayu suciu, utilizando la demagoxa, col únicu oxetivu de convencer al pueblu llano de que gano'l so patrón. Saben que los analfabetos políticos, que son lexón, déxense llevar poles sensaciones, polo que piensa la mayoría. Y les sensaciones, güei, xenérenles les encuestes y los titulares de prensa.

Nun hai más que ver los titulares pa entender que los principales periódicos españoles nun faen periodismu, sinón política.

El País:

Zapatero tumba a Rajoy

El Mundo:

Rajoy reta en vano a Zapatero a que defienda el español en Cataluña

La Vanguardia:

Zapatero se impone

ABC:

Rajoy resiste un debate que Zapatero intentó convertir en una bronca

El Periódico de Catalunya:

Zapatero se impone con claridad a Rajoy

La Razón:

Rajoy mantiene su ventaja aportando soluciones

Público:

Rajoy no pasa el examen

Crítiques

Esti día un llector, conocedor del mio pensamientu políticu, estrañábase de que llanzara nesti blog más crítiques a la izquierda que a la derecha. La esplicación ye cenciella: yo nunca creyí na derecha.

Faltón González

Esti día un tal Felipe González, que según cuenten foi presidente del Gobiernu d'España, pronunció una fras de les que califiquen al que les pronuncia y que queden pa la historia: "Decir que Rajoy es más moderado y razonable que Zapatero sólo se le ocurre a un imbécil". Sobra dicir que nun me doi por aludíu, y non porque piense que Zp ye más moderáu y razonable que Rj, que tampocu. Pero peme xustu dexar claro que'l tal González falto-yos al respetu a más de la metá de los españoles. Porque acaba de llama-yos imbéciles a tolos votantes del PP (buenu, a toos menos a Gallardón, que va por llibre) y a muchos otros que, anque voten a otros partíos, pueden pensar que Rj ye más moderáu y razonable que ZP. Total, que too esto vien a demostrar que los demás nun sé, pero el que paez imbécil ye'l tal González. Imbécil y faltón.

Mentira

Esti día viose a Javier Bardem recoyer l'Óscar a la meyor interpretación masculina protagonista de 2007. Sedrá merecíu el premiu, eso nun voy discutilo, porque'l rapaz dicen que ye bon actor. Pero si m'estraña permuncho ver como estos Bardem y otros como ellos, antiamericanos declaraos y supermegaprogres, pierden el culu pa que-yos den premios, precisamente, los conservadorones americanos a los que tanto critiquen. Ye asina que cuando veo a esos presuntos izquierdistes neses folixes, entregaos al lluxu y a l escesu na vexiga mesma del Imperiu, envueltos en traxes desaxeraos, que cuesten el dineru que nun ganaríen munches families en venti años, dexo d'entender. O, meyor tovía, entiéndolo too: ye mentira; ye too mentira. Estos nun creyen en nada de lo que dicen. Ye namái otru papelón, col que pretenden combayar colos probes, asegurándo-yos que tan con ellos, que son como ellos, que piensen como ellos, que viven como ellos. Pero ye mentira: estos nun son socialistes, nun pueden selo. Son solo unos espabilaos que, col so cuentu al costín, viven como cures. Hai una colección d'ellos nesta península de pandereta y tarrañuela.

"La yenka"

Esti día Zapatero y Rajoy baillaron "La yenka". Tola nueche anduvieron colo de "izquierda, izquierda; derecha, derecha; delante, detrás; un, dos, tres". Esto ye, munchu movimientu aparente, pero, a la fin, too quedaba en mesmu sitiu. Nuna braera burlla a los ciudadanos, ensiñaron dambos milenta gráficos, surdíos de torpes manipulaciones matemátiques que nun engañaben nin a un neñu teta. Ye lo qu'hai. Y, polo que se ve, ye lo que gusta. Porque l'ochenta por cientu de los votantes, o más, darán-yos respaldu a estos dos individuos nes elecciones del prósimu 9 de marzu. Hai que da-yos tamién lo suyu a los medios de comunicación, que, casi sin escepción, proclamaron ganador al so candidatu, por puru interés políticu, sin dengún tipu d'analisis periodísticu imparcial y responsable. Lo que demuestra que les encuestes d'encargu son, polo xeneral, mentires mercenaries, y que la mayoría de los medios de comunicación nun pretenden informar, formar y entretener, sinón manipular, adoctrinar y distrayer.

Queda un segundu debate, el prósimu llunes. Depués de que Zapatero y Rajoy charraran ayeri ca ún de lo que-y petó, sin casi escuchar al otru; depués de que nun ficieran más qu'insultase y mirar p'atrás, sedría conveniente que'l llunes punxeran la vista al frente y se dedicaran a dar soluciones y propuestes de futuru pa resolver los problemes de los alministraos. Que son los que-yos paguen los sos sueldos (non chicos, por ciertu). Taría bien (sedría normal) que los dos únicos candidatos con posibilidaes reales d'algamar la presidencia del Gobiernu d'España ficieran daqué más que baillar otra vez "La yenka", una canción que tuvo bien va 42 años, pero que yá fiede.

Fidel Castro

Esti día talamente paez que l'universu enteru xira alredor de Fidel Castro.

El so manifiestu:

• Dominiu d'hades 2.0
  

Enllaces interesantes (de tolos senes):

• Voltairenet
  
• Rebelión
  
• Patria Grande
  
• Fidel-Castro
  
• CubaEncuentro
• Asturies Lliberal
  
• Wikipedia
  
• Enciclopedia
  
• El Mundo
  
• El País
  
• ABC
• BBC
  
• El Rancahuaso
  

Cortu Llamazares

Esti día vi a Gaspar Llamazares quemar una semeya de la Familia Real nun cortu virtual en Second Life. Pa cortu, Gasparín. Escarabáyaseme'l pelleyu al pensar nuna república col talibán Llamazares de presidente. Nunca'l comunismu español pudo llegar a menos. Amás, esi cosu que llamen Izquierda Xunida (que nin ye uno nin lo otro) aseguró nun comunicáu que nun pretende "de manera directa nin indirecta actuar de forma ofensiva escontra naide, nin escontra nada, seya una persona pública a títulu individual o una institución". Una de dos: o piensen que somos mordias, o los mordias son ellos. El panorama políticu español ta ermu. ¿Ú Julio Anguita?

Quiero ser progre

Esti día quiero ser progre. Dióme perhí. Quiero ganar 78.791,28 euros (13.109.766 pesetes) al añu. Pa los de lletres: más de un millón al mes. Un sueldín curiosu, pa dir tirando. Quiero tener coche oficial, pero un coche grandón, d'espatarrar, y gastos pagos. Quiero un plan de pensiones pa cobrar la xubilación másima en trabayando 11 años (los 35 namai se-y esixen a la plebe). Quiero vivir nun áticu de 220 metros cuadraos, nel centru de Madrid, gratis total, que pagar alquiler ye de probetones. Quiero disponer de 250.000 euros (41,6 millones de pesetes) de dineru públicu pa reformar el pisín como me pete. Y, sobre tóu, quiero que l'Estáu me regale 11.000 euros (1,8 millones de pesetes) pa camudar el mobiliariu del escusáu. Pa cagar a gustu, como de xuru yá lo fai el ministru de Xusticia, Mariano Fernández Bermejo, progre ente los progres.

Pensamientu únicu

Esti día un rebañu d'independentistes gallegos insultó, escorrió y intentó da-y en focicu a la presidenta del PP del País Vascu, María San Gil, que foi a dar una conferencia na Universidá de Santiago. Tola razón (discutible siempre) que pudieren tener los presuntos galleguistes pa criticar a la política vasca perdiéronla coles formes. Truñar ye propio de vaques resabiaes y de nazis. Esi proceder ye de fascistes. Porque fascista, naide lo escaeza, ye'l que quier eliminar pola fuercia el pensamientu del vecín. Fascistes son los que nun acepten más que'l so pensar. Entós, estos independentistes, que de xuru se creyen d'izquierdes, defenden el pensamientu únicu. ¡Demontres!, talamente como los capitalistes a los que tanto critiquen. La política tien estes coses. Nel otru lláu, ta'l demócrata, que ye'l que respeta les idees de los demás, por mui separtaes que tean de les de só. El demócrata fala, debate, discute, confrontia... pero respeta l'Estáu de derechu y al adversariu políticu. Lo peor ye que les formes d'esos que s'autoproclamen galleguistes, intolerables nuna democracia, perxudiquen a los demás independentistes, a los demócratas. Habelos, hailos. Otra cosa ye andar al buscu de dinamitar l¡Estáu de derechu. Eso yá sedría otru cantar.

Un trunfu grandiosu

Esti día lleo que "Camín de cantares", programa televisivu presentáu por Xosé Antón Fernández "Ambás", dirixíu por Ramón Lluis Bande y producíu por Ámbitu Audiovisual, tuvo'l sábadu pasáu una audiencia de 28.000 espectadores, lo que supunxo un 30,2 por cientu de share. Esta cifra fixo que la TPA liderara esi horariu y fora la cadena más vista n'Asturies, por delantre de les estatales y les locales. Ye un trunfu grandiosu qu'un programa dedicáu a los cantares tradicionales d'esti pequeñu país, y que se desarrolla n'asturianu, algame tales cifres. Estes coses presten.

El mocín de la película

Esti día nun puedo más que siguir cola tema de los obispos, porque lo que lleo nun me lo lleva'l cuerpu. Hai coses ¡ncompatibles dafechu. Como declarase demócrata y, a la par, esixir "la disolución definitiva d'esa cosa llamada Conferencia Episcopal". Son les ocurrencies d'un tal Alberto San Juan, al que-y dieron el caberu premiu "Goya" al meyor actor protagonista. Un rapaz permodernu y megaguai, que se creye mui progre. Pa entendenos, el mocín de la película.

Les cheques, la llei de peligrosidá social, el fascismu y l'estalinismu, a Dios gracies, son coses del pasáu, anque'l presuntu actor nun lo sepa. Un demócrata, paezme a min, defende la so opinión, respeta les de los demás, y hasta tá abiertu a camudar d'idea si dalgún-y ofrez meyores razones y argumentos que los propios. La Conferencia Episcopal puede dicir misa (ye lo suyu, dichu seya de pasu). Los obispos tienen derechu a dicir lo que-yos gusta y lo que non. Tienen derechu a pidir a los sos asociaos que voten a esti o a aquelli. Y a oponese al albuertu, al divorciu o a les carreres de panoyes. Y Alberto San Juan, por supuestu, tien derechu a criticar lo que-y dea la gana. Pero esixir la disolución de la Conferencia Episcopal (o amenazala con represalies, como fai el PSOE) paez un exemplu de actitú antidemocrática, soberbia, sectaria. ¿Tanto falar de tolerancia pa esto?

Alberto San Juan y tola corte de seudoprogres del mundu del cine español deberíen pasar pol mesmu aru que la Ilesia. Que-yos quiten toles subvenciones y tola maturranga que tienen montada. Y que pongan na declaración de la renta un apartáu onde poner una crucina, pa que cada contribuyente decida si da o nun da un tantu por cientu de lo que paga a Facienda pal cine español. Porque agora nun hai crucina que vala: oblíguennos a toos a pagar relixosamente (entiéndase la ironía) toles películes, seyan bones o males. Y a la vista de les ventes d'entraes en 2007, una de dos: o les películes españoles son más bien maluques, o traten temes que nun interesen a les espectadores. Porque nun las va ver nin Dios. Claro que, ¡como va dir a veles, si los que les faen quieren disolve-y la Conferencia Episcopal!

Remedando a Voltaire, nun toy d'alcuerdu cola mayoría de les coses que prediquen los obispos, pero defenderé con tol llombu el so derechu a espresales. Y tamién el de los demás, incluíu el mocín de la película, a nun face-yos nin putu casu. Pero dende'l respetu.

Una de obispos

Esti día formóse un xaréu que metía mieu a cuenta de que los obispos españoles pidieron el votu p'aquellos partíos y programes "compatibles cola fe y les esixencies de la vida cristiana". O lo que ye lo mesmo, la Ilesia quier que los católicos voten a los que s'opongan al albuertu y a la negociación cola ETA y a los que rechacen coses como'l matrimoniu homosexual y la asignatura de "Educación pa la Ciudadanía". El PSOE contestó calificando de "inmoral" que los obispos utilicen el terrorismu "pa facer política".

Nun entiendo nada. Pero si esto ye mui fácil: la Ilesia ye un club. Y como tolos clubs tien unes normes. Si ún pertenez al club, debe respetar eses regles, o marchar. Hai otres ilesies, otres relixones, otres creencies, l'agnosticismu, l'ateismu... Clubs d'esti tipu onde metese sobren. Y si ún nun pertenez al club, daran-y igual les sos regles, puestu que nun lu afectan. Un exemplu: nuna asociación de non fumadores los socios, digo yo, tendrán que ser nun fumadores. Los que nun seyan socios podrán facer lo que-yos dea la gana. Y los fumadores, loxicamente, nun podrán pertecener a esi club. Quiero dicir que si ún nun pertenez al club de los obispos, qué demónganos- y importa lo que digan. Pero, per otru llau, si yes católicu y queres siguir nel club, tendrás que face-yos casu, o marchar. Menudu xeroglíficu.

Resumiendo: nun acabo d'entender les crítiques a los obispos. ¡Que digan misa! Fara-yos casu el que sea sociu d'esi club. Los demás votarán lo que-yos pete. Pero quede claro que los obispos, como los fontaneros, los fumadores o los socios del Sporting de Xixón tienen derechu a opinar y a pidir el votu pa quien-yos dea la gana. Y los demás a nun face-yos nin putu casu, por supuestu.

¡Ah! y los que nun ten d'alcuerdu colos cures (que tamién tienen derechu a opinar, faltaría más) tiénenlo perfácil: l'apostasía. Lo que nun puede ser ye que un fumador quiera facese sociu d'un club de non fumadores o obligalos a que camuden les sos regles. Eso, como diría mio tíu Nel, son ganes de tocar los coyones.